Konimex Tuman Hokimligi Matbuot Xizmati – 11 sahifasi

Aprel 22, 2022

АҲОЛИНИ РЎЙХАТГА ОЛИШ — КЕЛАЖАК САРИ ЯНГИ ҚАДАМ

By Konimex Tuman Hokimligi Matbuot Xizmati Statistika

Мамлакат фуқаролари тўғрисидаги маълумотлар ҳар қандай давлат миллий статистикасининг муҳим қисми саналади. Бундай маълумотлар маълум вақт оралиғида аҳолини рўйхатга олиш тадбирлари орқали тўпланади. Улар нафақат республика, балки Ер юзи аҳолисининг сони, ижтимоий ҳолати, даромадлари каби бир қанча муҳим ахборотларни ҳисоблаб боришга хизмат қилади.

БМТ дунё мамлакатларига фуқаролар билан юзага келадиган бир қатор ижтимоий муаммоларнинг ечими ҳамда иқтисодий кўрсаткичларнинг демографик кўрсаткичлар билан мутаносиб равишда ўсиб боришини таъминлаш учун ҳар ўн йилда камида бир маротаба аҳолини рўйхатга олиш тадбирини ўтказишни тавсия этади. Афсуски, юртимизда мустақилликдан сўнг кенг кўламда аҳолини рўйхатга олиш тадбири ўтказилмаган. Шу боис, мамлакатимизда илк бор 2023 йилда ўтказилиши кўзда тутилган аҳолини рўйхатга олиш тадбирига айни пайтда қизғин тайёргарлик кўрилмоқда.

Аҳолини рўйхатга олиш мамлакат ҳудудида миллати, элатидан қатъий назар барча инсонларни бирлаштирадиган умуммиллий тадбир бўлиб, унинг ўтказилишидан барчамиз, сиёсий қарашларимиз ва ижтимоий мавқеимиздан қатъи назар бирдек манфаатдормиз. Боиси, мазкур йирик ижтимоий тадбир орқали, биринчи навбатда, жами аҳолининг сони, фуқаролиги, никоҳ ҳолати, одамларимизнинг таълим даражаси (ўрта, ўрта махсус ёки олий), яшаш учун даромад манбалари, уйсизлар сони, уй хўжалинининг яшаш шароитлари каби бир қанча кўрсаткичлар бўйича бугунги кунда етарлича мавжуд бўлмаган маълумотлар базаси шакллантирилади. Шаҳарча, маҳалла, қишлоқ ва овуллар сони ҳамда уларнинг чегаралари, турар жойлар сони, улардаги мавжуд шарт-шароитлар тўғрисидаги маълумотларга аниқлик киритилади.

Аҳолини рўйхатга олиш, аввало, давлат ёки ҳукумат эмас, балки жамиятнинг ўзи учун зарур бўлиб, у вақти-вақти билан ўз-ўзини кўзгуда кўриш орқали ривожланиш натижаларини баҳолаш имкониятидир. Рўйхатга олишда қатнашаётган ҳар бир фуқаро ўзи ҳақидаги маълумотларни тақдим эта туриб, ўзлари мансуб бўлган кишилар гуруҳига тегишли ижтимоий дастурларни ишлаб чиқишда иштирок этади.

Мисол учун, ишсизларнинг сўровномадаги жавоблари меҳнат бозорини ўрганиш ва айнан керакли жойда янги иш ўринлари яратиш имконини берса, болалар сони тўғрисидаги маълумотлар мактаб, мактабгача таълим муассасалари ва шу каби муассасалар қурилиши режаларини тузишда қўл келади. Ёш ҳақидаги маълумотлар пенсияга чиқадиганлар сони, уларнинг пенсия тўловлари учун зарур бўладиган маблағларни жамғариб бориш имконини беради. Ҳар йили мактабгача таълим, умумтаълим мактаблари ёки олий таълимга қабул қилинадиган ёшлар тўғрисидаги маълумотлар ҳам худди шундай шаклланади. Яшаш жойи тўғрисидаги маълумотлар эса ҳар биримизнинг уйимизгача келадиган йўллар қурилиши, коммуникациялар билан таъминлашни режалаштириш учун зарур.

Ушбу тадбирларнинг аҳамиятли жиҳати шундаки, улар орқали нафақат ўзимиз, балки келажак авлод учун муҳим маълумотларни тўплашга эришамиз. Аҳолини рўйхатга олиш натижалари мамлакатимизнинг кейинги демографик ва ижтимоий сиёсатини белгилаш билан бирга, республика ва ҳудудларни ижтимоий-иқтисодий ривожлантириш прогнозлари ҳамда дастурларини тузишда кенг қўлланилади. Кейинги ўн йилликка мўлжалланган оилаларни қўллаб-қўвватлашга қаратилган ижтимоий дастурларни шакллантириш, шифохоналар, болалар боғчалари, мактаблар ва уй-жой қурилишини режалаштиришда фойдаланилади.

Рўйхатга олиш натижасида шакллантириладиган мамлакатдаги иш берувчилар ҳақидаги маълумотлар хусусий тадбиркорликни ривожлантириш ва рағбатлантиришга йўл очади. Бизнес вакиллари рўйхатга олиш маълумотлари орқали меҳнат ҳамда истеъмол бозорининг ҳолатини баҳолаш, талаб ва таклифлар эҳтиёжини аниқлаш имконига эга бўлади. Бир сўз билан айтганда, аҳоли тўғрисида тўпланадиган маълумотлар барча соҳаларни ривожлантириб, мамлакатни янада тараққий эттиришга, жаҳон майдонида Янги Ўзбекистоннинг янгича қиёфасини акс эттирувчи омил бўлиб хизмат қилади.

Aprel 22, 2022

ҲОКИМИНИНГ НАВБАТДАГИ САЙЁР ҚАБУЛ “БИРЛИК” МАҲАЛЛАСИДА БЎЛИБ ЎТДИ

By Konimex Tuman Hokimligi Matbuot Xizmati Tuman yangiliklari

Навбатдаги сайёр қабул бугун “Бирлик”, “Наврўз” ва “Дўстлик” маҳалла фуқаролари учун ўтказилди.

Қабул жараёнида Конимех тумани ҳокими М.Эгамқулов, туман прокуратураси, туман ИИБ, ҳоким ўринбосарлари, тегишли ташкилот раҳбарлари, ва маъсуллар иштирок этдилар.

Ўтказилган қабулда фуқаролар иш билан таъминланиш, ижтимоий ёрдам, уй-жой таъмири, ижтимоий ёрдамга мухтожлар учун белгиланган уй-жой олиш,

тадбиркорлик қилиш учун ер майдони ажратиш, йўл, сув таъминоти, тиббий-ижтимоий ёрдам ва бошқа ўзларини қийнаётган масалалар бўйича мурожаат қилишди.

Мурожаатлар тегишли тартибда мутахассислар ва ҳоким ўринбосарларига йўналтирилиб, ечим топилган мурожаатлар жойида ҳал этилди.

Барча мурожаатлар тегишли тартибда рўйхатга олиниб, ечими топилган мурожаатлар жойида ҳал этилди ва айрим мурожаатлар ҳуқуқий маслаҳат ва тушунчалар билан қониқтирилди.

Муддат талаб этилувчи мурожаатлар эса ҳал этиш учун тегишли мутасаддиларга бириктирилиб, назоратга олинди.

Aprel 21, 2022

БЮРОКРАТИЯНИНГ ОЛДИНИ ОЛИШ ВА ДАВЛАТ ХИЗМАТЛАРИ КЎРСАТИШ МИЛЛИЙ ТИЗИМИНИ ИСЛОҲ ҚИЛИШ БЎЙИЧА МУҲИМ ҲУЖЖАТ ИМЗОЛАНДИ.

By Konimex Tuman Hokimligi Matbuot Xizmati Normativ hujjatlar

Хабарингиз бор, Давлатимиз раҳбари бошчилигида давлат хизматларини кўрсатишда бюрократизм, сансалорлик ва бошқа маъмурий тўсиқларни бартараф этиш, бюрократик тартиб-таомилларни тубдан қисқартиришга қаратилган тизимли ислоҳотлар амалга ошириб келинмоқда.

Ушбу ислоҳотларнинг мантиқий давоми сифатида жорий йилнинг 20 апрель куни Давлатимиз раҳбарининг “Давлат хизматлари кўрсатишни соддалаштириш, бюрократик тўсиқларни қисқартириш ҳамда давлат хизматлари кўрсатиш миллий тизимини ривожлантиришнинг қўшимча чора-тадбирлари тўғрисида”ги Фармони қабул қилинди.

Фармон билан аҳолига давлат хизматларини қулай ва осон шаклларда кўрсатиш кўламини ошириш ва фуқароларнинг идорама-идора сарсон бўлиб юришининг олдини олиш, давлат органлари ахборот тизимида мавжуд маълумотларни ишончли ҳимоя қилиш бўйича ишларни, давлат хизматлари кўрсатиш кўламини ошириш, бунда аҳолининг масофадан туриб электрон давлат хизматларидан мустақил фойдаланиш имкониятларини кенгайтириш бўйича устувор вазифалар белгилаб берилди.

Хусусан, Фармонга мувофиқ 2022 йил 1 августдан бошлаб давлат хизматлариданфойдаланиш учун жисмоний шахсни идентификациялашнинг Мобил-ID тизими жорий этилиши белгиланмоқда. Мобил-ID тизими фойдаланувчилари электрон рақамли имзони қўлламаган ҳолда барча давлат хизматларидан (бундан молиявий хизматлар мустасно) масофадан туриб фойдаланиш имкониятига эга бўлади.

Коммунал ташкилотларига аҳолига ва тадбиркорлик субъектларига хизмат кўрсатишда 35 турдаги маълумот ва ҳужжатларни талаб қилиш бекор қилинади ва улар “Электрон ҳукумат” тизимдан олинади.

Фармон иловаси билан 7 та устувор масалалар тасдиқланди. Хусусан:

Давлат хизматлари кўрсатиш тизимини модернизация қилиш ва жадал ривожлантиришнинг 2022–2026 йилларга мўлжалланган миллий стратегияси тасдиқланди. Эндиликда “Фуқаро эътибор марказида” (Citizen – centric service) тамойили асосида давлат хизматлари кўрсатиш миллий тизимини модернизация қилинади;

Миллий стратегияни 2022–2023 йилларда амалга ошириш бўйича “йўл харитаси” тасдиқланди. Унга асосан 2022-2023 йилларда 100 дан ортиқ давлат хизматлари рақамлаштирилади ва уларни ЯИДХП орқали ҳамда давлат хизматлари марказлари орқали кўрсатиш йўлга қўйилади;

– 6 турдаги (тиббий, фармацевтика, архитектура-шаҳарсозлик, солиқ, меҳнат, заргарлик буюмлари фаолиятига тегишли) лицензия ва рухсат этиш хусусиятига эга ҳужжатларни олиш учун амалда мавжуд бўлган 17 та бюрократик талаб бекор қилинди;

38 турдаги давлат хизматларидан ЯИДХПда электрон рақамли имзосиз фойдаланишга рухсат берилди;

8 та вазирлик ва идоранинг электрон тизимлари “Электрон ҳукумат” тизимига интеграция қилиниши белгиланди. Бунинг натижасида аҳоли ва тадбиркорларнинг электрон давлат хизматларидан фойдаланиш имконияти янада кенгаяди;

маъмурий ҳуқуқбузарлик тўғрисидаги кўриб чиқиш ваколатига эга бўлган 21 та давлат органларининг ахборот тизимлари Ягона биллинг тизимига интеграция қилиниши белгиланди. Бунинг натижасида жарималарни электрон тўлаш ва натижаларидан хабардор бўлиш имконияти яратилади;

2022–2026 йилларда давлат хизматлари кўрсатиш тизимини жадал ривожлантиришнинг мақсадли кўрсаткичлари белгилаб берилди.

Яна бир муҳим жойи, янги ўқув йили учун олий таълим муассасаларига кириш учун тест топширишда “Ижтимоий ҳимоя ягона реестри”да рўйхатга олинган шахслар, уларнинг фарзандлари ҳамда “Ёшлар дафтари”га киритилган ёшлар тест синовларида иштирок этиш учун ундириладиган тўловлардан озод этилади.

2022 йил 1 сентябрдан бошлаб тижорат банкларига, телекоммуникация ташкилотларига, хусусий тиббиёт муассасалари, нодавлат таълим ташкилотларига, суғурта ташкилотларига фаолият йўналишидаги нодавлат ташкилотларга ҳам “Электрон ҳукумат” тизими орқали олиш мумкин бўлган маълумотлардан фойдаланиш имконияти яратилади. Фақат, ушбу ташкилотлар шахсга доир маълумотлар тўғрисидаги қонунчилик талабларига риоя этиши шарт ва бу тегишли лицензия талаб ва шартларидан бири ҳисобланади.

Аҳолининг электрон давлат хизматларидан фойдаланиш даражаси оширилади, иш юритиш “қоғозсиз” тамойил асосида олиб бориш йўлга қўйилади.

Бизнес жараёнларини модернизациялаш усулларидан фойдаланган ҳолда ҳар бир давлат хизматини мақбуллаштириш, муддатлар ва талаб этиладиган ҳужжатлар сонини максимал даражада қисқартириш чоралари кўрилади.

Аҳоли ва тадбиркорлик субъектларининг эҳтиёжи ва талабларидан келиб чиқиб давлат хизматларининг янги турлари йўлга қўйилади, ўз аҳамиятини йўқотган давлат хизматлари бирлаштирилади ёки бекор қилинади.

Жисмоний имконияти чекланган ва ногиронлиги бўлган шахсларга давлат хизматларини кўрсатишда инклюзив муҳит яратилади.

Аҳоли ва тадбиркорлик субъектларининг давлат хизматларидан мустақил фойдаланиш кўникмалари ошириб борилади.

Проактив давлат хизматлари ҳамда битта сўров бўйича ўзаро боғлиқ композит давлат хизматлари кўрсатиш кенгайтирилади.

Шахсга доир маълумотларнинг конфиденциаллигини ва ишончли ҳимоя қилинишини таъминлаш мақсадида 2022 йил 1 августдан бошлаб шахсга доир маълумотларни “Электрон ҳукумат” тизимидан фойдаланган ҳолда олишнинг қуйидаги тартиби жорий этилади:

давлат органлари томонидан шахсга доир маълумотлар “Электрон ҳукумат” тизими орқали сўраб олинганда шахсга доир маълумотлар субъектининг ЯИДХПдаги шахсий кабинети ёки Мобил-ID тизими орқали идентификациядан ўтган мобил телефон рақамига бу ҳақида хабарнома юборилади (бундан давлат сири ва қонунчиликка мувофиқ фойдаланиш чекланган маълумотларни ўз ичига олган ҳолатлар мустасно);

хўжалик бирлашмалари, давлат ташкилотлари ва муассасалари, “Электрон ҳукумат” тизимидан фойдаланишга рухсат берилган нодавлат ташкилотлар томонидан ишларни бажариш ва хизматларни кўрсатишда шахсга доир маълумотлар унинг субъекти розилиги билан “Электрон ҳукумат” тизими орқали тақдим этилади. Бунда, маълумотлар тегишли ташкилотга шахсга доир маълумотлар субъектининг ЯИДХПдаги шахсий кабинети ёки Мобил-ID тизими орқали идентификациядан ўтган мобил телефон рақамидан тасдиқ олингандан сўнг “Электрон ҳукумат” тизими орқали тақдим этилади.\

Конимех туман адлия бўлими.

Aprel 20, 2022

“Ташаббусли бюджет” лойиҳаси ғолиблари эълон қилинди

By Konimex Tuman Hokimligi Matbuot Xizmati Tuman yangiliklari

“Ташаббусли бюджет” лойиҳаси ғолиблари эълон қилинди (https://openbudget.uz/boards/4?stage=4&page=1).

Сайтдаги маълумотларга кўра, 2215 та ташаббус ғолиб деб топилган ва энди улар давлат бюджетидан молиялаштирилади.

Туманимиздан 4 та ташаббус ғолиб дея топилган.

Улар билан қуйидаги манзил орқали танишиб чиқишингиз мумкин.

Aprel 13, 2022

“Tadbirkorlik muhitini yaxshilash va xususiy sektorni rivojlantirish bo’yicha Prezident Farmoni

By Konimex Tuman Hokimligi Matbuot Xizmati Normativ hujjatlar

“Tadbirkorlik muhitini yaxshilash va xususiy sektorni rivojlantirish orqali barqaror iqtisodiy oʻsish uchun shart-sharoitlar yaratish borasidagi navbatdagi islohotlar toʻgʻrisida”gi Prezident Farmoni qabul qilindi.

?Farmonga muvofiq, quyidagilar joriy etiladi:

▫️qishloq xoʻjaligiga moʻljallanmagan yerlarni mulk huquqi asosida auksion orqali sotishda toʻlovlarni 3 yilgacha boʻlib-boʻlib toʻlashga ruxsat etiladi;

▫️boʻlib-boʻlib toʻlash sharti bilan sotilgan davlat aktivlari va qishloq xoʻjaligiga moʻljallanmagan yerlar boʻyicha kamida 35 foizi miqdoridagi dastlabki toʻlovni biryoʻla amalga oshirgan xaridorlarga mazkur mulklarni kredit taʼminoti sifatida garovga qoʻyish huquqi beriladi.

✅ 2022-yil 1-maydan roʻyxati Vazirlar Mahkamasi tomonidan tasdiqlanadigan xorijiy davlatlar fuqarolariga Oʻzbekistonda yashash guvohnomasini talab qilmagan holda, yangi barpo etilayotgan quyidagi koʻchmas mulk obyektlarini sotib olish tarzida investitsiya kiritish huquqi beriladi:

?Toshkent viloyati, Toshkent va Samarqand shaharlarida – qurilish davrida tuzilgan shartnomalarga asosan qiymati 150 ming AQSH dollari ekvivalentidan, foydalanishga qabul qilingan koʻchmas mulk obyektlarida qiymati 180 ming AQSH dollari ekvivalentidan kam boʻlmagan koʻchmas mulk obyektlari;

?boshqa hududlarda – qurilish davrida tuzilgan shartnomalarga asosan qiymati 70 ming AQSH dollari ekvivalentidan, foydalanishga qabul qilingan koʻchmas mulk obyektlarida qiymati 85 ming AQSH dollari ekvivalentidan kam boʻlmagan koʻchmas mulk obyektlari.

Bunda, mazkur koʻchmas mulk obyektlarini sotib olish xorijiy davlatlar fuqarolariga Oʻzbekistonda doimiy roʻyxatdan oʻtish va yashash guvohnomasini olish uchun asos boʻlmaydi.

? Xorijiy mamlakatlar fuqarolariga koʻchmas mulk sotib olish sharti bilan Oʻzbekistonda yashash guvohnomasini olish uchun talab etiladigan koʻchmas mulk qiymati miqdori Toshkent viloyati va Toshkent shahrida 400 ming AQSH dollaridan 300 ming AQSH dollari ekvivalentigacha kamaytirildi.

Farmonga koʻra, quyidagilar joriy etildi:

➡️ oxirgi yildagi savdo tushumi BHMning 10 ming baravaridan (2,7 mlrd soʻmdan) oshmaydigan tadbirkorlarga nisbatan monopoliyaga qarshi choralar qoʻllanilmaydi;

➡️ 2022-yil 1-sentyabrdan raqobatga qarshi harakat qilgan xoʻjalik yurituvchi subyektlarga quyidagilar uchun moliyaviy jarimalar qoʻllaniladi:

?tovar va moliya bozorida raqobatni cheklashga olib keluvchi kelishuvlar va iqtisodiy faoliyatni muvofiqlashtirish;

? ijtimoiy va strategik ahamiyatga ega mahsulotlar narxlarini asossiz oshirganlik va insofsiz raqobat;

?xoʻjalik yurituvchi subyektlarni qoʻshib yuborishda, qoʻshib olishda va aksiyalarni sotib olish bitimlarini tuzishda raqobatni buzish;

?ommaviy savdolarda raqobatga zid harakatlar amalga oshirganlik va monopoliyaga qarshi talablarni buzish.

☑️ 2022-yil 1-maydan norezident shaxsning Oʻzbekistondagi manbalardan oladigan daromadlari boʻyicha daromad soligʻi 12 foiz miqdorida belgilanadi (ilgari 20 foizgacha).

❗️ 2022-yil 1-iyuldan bojxona bojlari boʻyicha imtiyozlar faqatgina qonunlar bilan beriladi.

✅ Farmonga koʻra, Toshkent shahri misolida Nukus shahri va barcha viloyatlar markazlarida jamoat transporti infratuzilmasini rivojlantirish strategiyasi joriy etiladi.

2022-yil 1-iyuldan davlat ishtirokidagi korxonalar kuzatuv kengashi aʼzolarini ragʻbatlantirish va ijro organi aʼzolariga haq toʻlashda yagona ragʻbatlantirish siyosati joriy etiladi.

Bunda, ijro organi aʼzolariga ish haqi va yil boʻyicha bir yoʻla toʻlanadigan mukofotdan tashqari har qanday qoʻshimcha toʻlov bekor qilindi.

Davlat ishtirokidagi korxonalarga Prezident va Hukumat qarorlarida nazarda tutilmagan hollarda quyidagilar taqiqlanadi:

faoliyatiga xos boʻlmagan yangi obyektlarni sotib olish yoki qurish;

raqobat rivojlangan sohada faoliyatidan tashqari qoʻshimcha faoliyat bilan shugʻullanish;

faoliyatiga xos boʻlmagan xoʻjalik jamiyatlari ustav kapitalida ishtirok etish yoki undagi ulushni sotib olish.

Davlat ishtirokidagi korxonalar va davlat ulushi 50 foiz va undan koʻp boʻlgan banklar tomonidan mulkni sotish, boshqa korxonaga investitsiya kiritish kelishuvlari majburiy tarzda korxonalar kuzatuv kengashi bilan kelishiladi.

Davlat korxonalarining homiylikka sarflanadigan har yilgi xarajatlari oʻtgan yilda olingan sof foydaning 3 foizidan oshmasligi kerak.

Aprel 12, 2022

КЎЧАЛАРИМИЗ ЯШИЛЛИККА ЮЗ ТУТМОҚДА

By Konimex Tuman Hokimligi Matbuot Xizmati Tuman yangiliklari

https://t.me/konimex_tumani_axborot_xizmatiApril 12, 2022

Президентимиз ташаббуси билан бошланган «Яшил макон» умуммиллий лойиҳаси асосида бошланган дарахт кўчатларини экиш ишларида Конимех туман ҳокимлиги фаол иштирок этишмоқда.

“Бирлик” маҳалласи “Ибн Сино” кўчасида бир неча йиллардан буён бўш ётган ерларни яшил маконга айлантириш мақсадида Конимех тумани ҳокими М.Эгамқулов бошчилигида 20.000 дона гул кўчатлари, 250 та арча, 400 туп чинор ва 1000 та тут кўчатлари ушбу ҳудудга экилмоқда.

Президентимиз Ш.Мирзиёев таъкидлаганларидек, “Яшил макон” умуммиллий лойиҳаси – бу бир йиллик тадбир эмас.

Дарҳақиқат, яшаб турган жойимизни озода сақлаб, биздан кейинги авлод ҳам муносиб табиий муҳитда яшашлари учун бугун биз табиатга меҳр ва эътибор берсак келажак авлод ҳам муносиб экологик шароитда яшайди.

Бунинг учун биздан талаб қилинадиган биргина нарса, табиатни тоза-озода сақлаган ҳолда ер ва сув ресурсларини, экологик тизимни асраш ҳамда дарахт кўчатларини экиб, боғ яратишдир.

Конимех тумани ҳокимлиги матбуот хизмати.

Aprel 8, 2022

KONIMEX TUMAN DAVLAT SOLIQ INSPEKSIYASI BOSHLIG‘INING 2022 YIL 1-CHORAGI YAKUNI BO‘YICHA HISOBOTI VA TADBIRKORLARGA MUROJAATI

By Konimex Tuman Hokimligi Matbuot Xizmati Tuman yangiliklari

Xabaringiz bor, joriy yil 16 mart kuni Prezidentimiz Davlat soliq qo‘mitasiga tashrif buyurib, soliq organlari xodimlari bilan muloqot davomida tadbirkorlar bilan uchrashib ularning muammolarini o‘rganish, soliq qonunchiligidagi o‘zgarishlar bo‘yicha tushuntirishlar berish yuzasidan zarur topshiriqlar bergan edi.

Mazkur topshiriqlar ijrosini bajarish, tumanda faoliyat yuritayotgan tadbirkorlarning muammolarini o‘rganish va qisqa muddatda ijobiy hal etish maqsadida joriy yilning 28-29 mart kunlari Navoiy viloyatining Zarafshon va Navoiy shahri, Navbahor hamda Qiziltepa tumanlarida ham Davlat soliq qo‘mitasi rahbariyati ishtirokida qator uchrashuvlar tashkil etildi. Xususan mazkur muloqotlarda Konimex tumanidan ham 35 nafar tadbirkorlar ishtirok etib, ular duch kelgan muammolar va ularni o‘ylantirayotgan savollar batafsil o‘rganildi.

Bugungi kunda ham “Soliqchi-ko‘makchi” tamoyili asosida tuman davlat soliq inspeksiyasi tomonidan tadbirkorlar huzuriga borgan holda ularning muammolarini o‘rganib, sayyor soliq maslahatlari ko‘rsatilmoqda.

Masalan, 1-chorak davomida tumanda 127 ta korxonalarning muammolari batafsil o‘rganildi. Natijada, soliq inspeksiyasi xodimlari ko‘magi bilan 43 ta muammolar ijobiy hal etildi. Bugungi kunda boshqa tashkilotlar bilan bog‘liq masalalar qat’iy nazoratga olinib, hamkorlikda hal etish choralari ko‘rilmoqda.

Shuningdek, o‘rganishlar davomida soliq turlari bo‘yicha 7 ta subyektlarning 29,7 million so‘m mavjud ortiqcha to‘lov summasi qaytarib berildi.

E’tiborli jihatlardan yana biri, soliq islohotlarining jadallik bilan amalga oshirilishi hamda soliq mexanizmlarining yanada soddalashishi natijasida, yashirin iqtisodiyot keskin qisqarib, soliq tushumlari sezilarli darajada ortmoqda. Masalan, Konimex tumanining 2022 yil 1-choragi uchun belgilangan 5,7 milliard so‘mlik budjet prognoz rejasi 5,8 milliard so‘mga (102,5 %) ortig‘i bilan bajarilib, 0,1 milliard so‘mga ko‘p mablag‘ davlat budjetiga tushishiga erishildi. Natijada, tushumlar miqdori o‘tgan yilning mos davriga (5,6 mlrd.so‘m) nisbatan 104,3 foizga o‘sishi kuzatildi.

Joriy etilgan qator soliq imtiyozlari, soliq yuki va turlarining kamaytirilganligi to‘g‘risida tadbirkorlar o‘rtasida olib borilayotgan tushuntirish-targ‘ibot ishlari natijasida 146 ta norasmiy ish o‘rinlari qonuniylashtirildi. Muhimi, fuqarolar muqim ish o‘rinlariga ega bo‘ldi.

Ayniqsa, turli sabablar bilan faoliyati vaqtincha to‘xtab qolgan tadbirkorlik subyektlarini har tomonlama qo‘llab-quvvatlash, ular faoliyatini tiklash borasida joriy yilning 1-choragi davomida samarali ishlar amalga oshirildi. Jumladan, ana shunday 8 ta korxonaning faoliyati tiklandi. Natijada, 12 ta yangi ish o‘rinlari yaratildi. E’tiborlisi, mazkur tadbirkorlik subyektlari ish boshlashi bilan ularga qo‘llanilgan ta’sirchan soliq mexanizmlari bekor qilinib, qariyb 54 million so‘mlik mablag‘ ular ixtiyorida qoldirildi.

Shu o‘rinda ta’kidlash o‘rinliki, bugungi tadbirkor kechagisidan tubdan farq qiladi. Qonunchiligimiz ham ular uchun qator yengillik va qulaylik yaratishga qaratilgan. Buning natijasida, iqtisodiyotda xufyona bozor mexanizmlariga o‘z-o‘zidan chek qo‘yilmoqda. Halol tadbirkor uchun shaffof va qonuniy ishlaydigan davr keldi. Shu bois, savdo va xizmat ko‘rsatish sohasida onlayn nazorat-kassa mashinalaridan foydalanuvchilar soni bugun 192 nafarni tashkil etmoqda.

Bugungi kunda qo‘lida hunari bor yoki uyda yakka tartibda ma’lum faoliyat bilan shug‘ullanib kelayotgan fuqarolarimiz talaygina. Ularning o‘zini o‘zi band qilishi, ish stajiga ega bo‘lishi uchun soliq xizmati organlari tomonidan doimiy ko‘mak ko‘rsatib kelinmoqda. Jumladan, joriy yilning 1-choragi yakuni bilan tumanda 778 nafar fuqarolar o‘zini o‘zi band qilish tizimi orqali ro‘yxatdan o‘tib, muayyan faoliyat turlari bilan muntazam shug‘ullanib kelmoqda. Eng muhimi, ularning 262 nafarini 30 yoshgacha bo‘lgan yoshlar tashkil etadi.

Hurmatli soliq to‘lovchilar! Biz soliq xizmati organlari xodimlari sizlarning muammolaringizni qonuniy hal etish, faoliyatingiz davomida yuzaga kelgan barcha tushunmovchiliklarga yechim topishda doimiy ko‘mak berishga tayyormiz.

Aprel 4, 2022

“BOʻZATOV FEST” YOSHLAR OVOZI TANLOVI

By Konimex Tuman Hokimligi Matbuot Xizmati Tuman yangiliklari

Besh tashabbus olimpiadasi doirasida oʻtkazilayotgan “Boʻzatov FEST” Yoshlar ovozi tanlovining 4-5-aprel kunlari boʻlib oʻtadigan mahalla bosqichi manzillari

Aprel 1, 2022

Ҳокимликлар ҳузурида тадбиркорлик инфратузилмасини ривожлантириш жамғармалари ташкил этилди

By Konimex Tuman Hokimligi Matbuot Xizmati Tuman yangiliklari

“Республика ҳудудларида тадбиркорлик инфратузилмасини ривожлантиришга доир қўшимча чора-тадбирлар тўғрисида”ги Президент фармони (ПФ–54-сон, 21.01.2022 й.) қабул қилинди.

Фармон билан Қорақалпоғистон Вазирлар Кенгаши, вилоятлар ва Тошкент шаҳар ҳокимликлари ҳузурида тадбиркорлик инфратузилмасини ривожлантириш жамғармалари ташкил этилди.

Жамғармаларни шакллантиришнинг асосий манбаси ерни хусусийлаштиришдан ва ерни ижарага беришдан тушадиган маблағлар ҳисобланади.

Жамғармалар маблағлари қуйидагилар учун сарфланади:

-“Янги Ўзбекистон”, давлат уй-жой дастурларидаги массивларни ташқи муҳандислик-коммуникация билан таъминлаш;

-200 миллиард сўмдан ошадиган, инвесторнинг ўз маблағлари 25 фоиздан кам бўлмаган, инвестиция дастурларига киритилган лойиҳаларни ташқи муҳандислик-коммуникация тармоқлари билан таъминлаш;

-аҳоли пунктлари бош режалари, ҳудудларнинг маъмурий-режалаштирув топшириқлари ва батафсил режалаштириш лойиҳаларини ишлаб чиқиш.

Фармон билан шунингдек, Урбанизацияни ривожлантириш жамғармаси тугатилди.

Aprel 1, 2022

ЎЗБЕКИСТОН ҚОНУНЧИЛИГИДА 1 АПРЕЛДАН НИМАЛАР ЎЗГАРАДИ?

By Konimex Tuman Hokimligi Matbuot Xizmati Tuman yangiliklari

Ўзбекистон қонунчилигида 2022 йил 1 апрелдан бир қатор ўзгариш ва янгиликлар кучга киради. Қуйида мамлакатда кучга кирадиган асосий ўзгаришлар тақдим этилди.

Ногиронлик нафақаси ва пенсиясининг энг кам миқдори оширилади

Меҳнатга лаёқатсиз фуқароларга бериладиган ногиронлик нафақаси ҳамда иш стажи тўлиқ бўлмаган чоғдаги ногиронлик пенсиясининг энг кам миқдори қўшимча тўловни ҳисобга олган ҳолда — 440 минг сўмдан 622 минг сўмгача оширилади.

Ўзгалар парваришига муҳтож ногиронлиги бўлган 18 ёшгача болаларнинг парвариши билан банд бўлган боланинг қонуний вакилига ҳар ойда 500 минг сўм миқдорида парваришлаш нафақаси жорий этилади.

Кексалар учун бир қатор имтиёзлар берилади

Ўзгалар парваришига муҳтож ёлғиз кексалар ва ёлғиз яшайдиган кексалар ҳар йили бир маротаба санаторийларда бепул соғломлаштирилади.

Шароити оғир ва кам таъминланган кексаларга рецептга асосан 3 ойлик эҳтиёж асосида дорилар, тиббий ва махсус протез-ортопедия мосламалари олиб берилади ҳамда жарроҳлик амалиётларининг харажатлари қопланади.

Оғир ташхисли касал ҳамда ногирон кексаларга шифокорлар рецептларига мувофиқ, 3 ойлик эҳтиёждан келиб чиқиб дори воситаларининг 50 фоизигача суммаси компенсация қилинади.

Кексаларнинг жисмоний тарбия ва спорт билан шуғулланишлари учун абонемент харажатлари қопланади. Давлат театрлари ва музейларига кексалар учун чипта нархлари тўлиқ қоплаб берилади.

Айрим боғчаларга болаларни 2 ёшдан қабул қилишга рухсат берилади

Тўлиқ қувват билан ишламаётган давлат боғчаларига 2 ёшдан 3 ёшгача болаларни пуллик хизмат кўрсатиш шаклида қабул қилишга рухсат берилади.

Хусусий боғча ва мактабларга фарзандларини юбораётган ота-оналар даромад солиғидан озод қилинади

Нодавлат мактабгача таълим ташкилотлари ва мактабларга фарзандларини юбораётган ота-оналарнинг ойига 3 миллион сўмгача бўлган тўловлари даромад солиғидан озод этилади. Шунингдек, Қорақалпоғистон Республикаси ва Хоразм вилоятида 1—4-синф ўқувчилари бепул овқат (нонушта ёки тушлик) билан таъминланади.

Дарахтларни ноқонуний кесганларни фото ва видеога олиб юборганлар мукофотланади

Дарахтларни ноқонуний тарзда кесиш ҳолатлари тасвирланган фото ва видеоларни биринчи бўлиб юборган шахсларга БҲМнинг бир баравари — 270 минг сўм миқдорида пул мукофоти тўлаб берилади. Ҳуқуқбузарлик ҳақида хабар берганларнинг маълумотлари ошкор қилинмайди.

UzAuto Motors автомобили фақат харид қилиш бўйича шартнома тузган шахс номига расмийлаштирилади

Ушбу компания томонидан автомототранспортни харид қилиш бўйича шартнома тузган шахсга автоматик равишда расмийлаштириладиган ҳисоб-маълумотни Ички ишлар вазирлиги Жамоат хавфсизлиги департаменти йўл ҳаракати хизматига фақат электрон шаклда тақдим этиш амалиёти жорий қилинади.

Тошкентда ўлим ҳақида тиббий гувоҳнома бериш тартиби бекор қилинади

Тиббиёт муассасаси ходими ўлим ҳолати тасдиқлангандан сўнг, вафот этган шахс ҳақидаги маълумотларни ФҲДЁ бўлимига автоматлаштирилган ахборот тизими орқали юборади. ФҲДЁ ахборот тизими орқали автоматик равишда ўлим ҳақидаги далолатнома ёзувини қайд этади ва маълумотни тиббиёт муассасаси ва Пенсия жамғармасига электрон шаклда юборади.

Инвесторлар, IT-компаниялар таъсисчилари ва ахборот технологиялари соҳасидаги мутахассислар, шунингдек, уларнинг оила аъзолари учун IT-Visa жорий этилади

IT-Visa жисмоний шахсларга 3 йилгача амал қилиш муддати билан берилади. IT-Visa эгалари визанинг амал қилиш муддати давомида Ўзбекистонга эркин кириб-чиқишлари, Ўзбекистоннинг исталган ҳудудида қайта рўйхатдан ўтиш мажбуриятисиз қолишлари, Ўзбекистон фуқаролари учун назарда тутилган шартларда таълим ва тиббий хизматлардан фойдаланишлари мумкин.

Жисмоний шахсларнинг акциялардан оладиган дивидендлари даромад солиғидан озод қилинади

2022 йил 1 апрелдан 2024 йил 31 декабргача:

Ўзбекистон резиденти ва норезиденти бўлган жисмоний шахсларнинг акциялардан олган дивидендлари даромад солиғидан озод қилинади;
норезидент юридик шахсларнинг акциялар бўйича дивидендлари учун фойда солиғининг 5 фоиз ставкаси татбиқ этилади;
резидент ва норезидент жисмоний ва юридик шахсларнинг хўжалик жамиятлари облигациялари бўйича даромадлари даромад солиғи ва фойда солиғидан озод қилинади.

Бир қатор соҳалардаги тадбиркорлар учун ижтимоий солиқ ставкаси 1 фоиз этиб белгиланди

Қуйидаги соҳаларда фаолият юритувчи тадбиркорлик субъектлари учун 2022 йил 1 апрелдан 2025 йил 1 январгача ижтимоий солиқ ставкаси 1 фоиз этиб белгиланди:

чакана савдо ва умумий овқатланиш;
меҳмонхона (жойлаштириш) хизматлари;
автотранспортда йўловчи ва юк ташиш;
транспорт воситаларини таъмирлаш ва уларга техник хизмат кўрсатиш;
компьютер хизматлари;
маиший техникани таъмирлаш;
агро ва ветеринария хизматларини кўрсатиш;
кўнгилочар масканларда хизматлар кўрсатиш.

Бу имтиёз тадбиркорлик субъектлари томонидан, агар уларнинг юқоридаги фаолият турларини амалга оширишдан олган даромадлари жорий ҳисобот (солиқ) даври якунлари бўйича жами даромаднинг камида 60 фоизини ташкил этса қўлланилади.

Конимех туман адлия бўлими

Previous page 1 … 9 10 11 12 13 … 22 Next page

Konimex Tuman Hokimligi rasmiy veb sayti

Mualliflik arxivlari: Konimex Tuman Hokimligi Matbuot Xizmati

АҲОЛИНИ РЎЙХАТГА ОЛИШ — КЕЛАЖАК САРИ ЯНГИ ҚАДАМ

ҲОКИМИНИНГ НАВБАТДАГИ САЙЁР ҚАБУЛ “БИРЛИК” МАҲАЛЛАСИДА БЎЛИБ ЎТДИ

БЮРОКРАТИЯНИНГ ОЛДИНИ ОЛИШ ВА ДАВЛАТ ХИЗМАТЛАРИ КЎРСАТИШ МИЛЛИЙ ТИЗИМИНИ ИСЛОҲ ҚИЛИШ БЎЙИЧА МУҲИМ ҲУЖЖАТ ИМЗОЛАНДИ.

“Ташаббусли бюджет” лойиҳаси ғолиблари эълон қилинди

“Tadbirkorlik muhitini yaxshilash va xususiy sektorni rivojlantirish bo’yicha Prezident Farmoni

КЎЧАЛАРИМИЗ ЯШИЛЛИККА ЮЗ ТУТМОҚДА

KONIMEX TUMAN DAVLAT SOLIQ INSPEKSIYASI BOSHLIG‘INING 2022 YIL 1-CHORAGI YAKUNI BO‘YICHA HISOBOTI VA TADBIRKORLARGA MUROJAATI

“BOʻZATOV FEST” YOSHLAR OVOZI TANLOVI

Ҳокимликлар ҳузурида тадбиркорлик инфратузилмасини ривожлантириш жамғармалари ташкил этилди

ЎЗБЕКИСТОН ҚОНУНЧИЛИГИДА 1 АПРЕЛДАН НИМАЛАР ЎЗГАРАДИ?

Spelling error report

The following text will be sent to our editors:

Your comment (optional):