Hurmatli foydalanuvchilar! Sayt test rejimida, tarkibni to'ldirish bo'yicha ishlar olib borilmoqda. Noqulayliklar uchun uzr so'raymiz. Sayt ma'muriyati.
May 3, 2021

Экспортёрларнинг дебитор қарздорликлари янгидан ҳисобланади.

Президент қарорига мувофиқ, 2021 йил 1 май ҳолатига шаклланган ташқи савдо операциялари бўйича муддати ўтган дебитор қарздорлик учун хўжалик юритувчи субъектларга жарималар қўллаш тўхтатилади. Дебитор қарздорлик вужудга келиш муддатлари 2021 йил 1 майдан бошлаб янгидан ҳисобланади.

Чет элдан хорижий валютадаги тушум тушиши кечиктирилишига йўл қўйган экспортёрларга «эркин муомалага чиқариш» божхона режимида товарларни олиб кириш ва расмийлаштириш, ишлар бажариш ёки хизматлар кўрсатишни ўз вақтида таъминламаган импортёрларга қонунчиликда белгиланган жарима миқдорлари икки бараварга камайтирилади.

25 ёшдан ошмаган ходимлар учун иш берувчиларга ижтимоий солиқ суммаси қайтариб берилади

Президент фармонига мувофиқ, 2021 йил 1 майдан 2023 йил 1 январга қадар иш берувчиларга (бюджет ташкилотлари, давлат корхоналари, устав жамғармаси (капитали)да давлат улуши 50 фоиз ва ундан ортиқ бўлган юридик шахслар бундан мустасно) улар томонидан 25 ёшдан ошмаган ходимлар учун тўланган ижтимоий солиқ суммаси Давлат бюджетидан тўлиқ қайтариб берилади.

Бунда, ижтимоий солиқ суммаси ёш ходимлар 6 ой давомида узлуксиз меҳнат фаолиятини амалга ошириши шарти билан, 7-ойдан бошлаб қайтарилади.

«Ёшлар дафтари»га киритилган ёшларга субсидиялар берилади.

1 майдан «Ёшлар дафтари»га киритилган ёшларга тадбиркорлик фаолиятини бошлаш ва ўзини ўзи банд қилишга зарур асбоб-ускуналар ва меҳнат қуролларини харид қилиш учун БҲМнинг 40 бараваридан кўп бўлмаган миқдорда субсидия ажратилади («Ёшлар дафтари» жамғармалари ҳисобидан).

Худди шу кундан, «Ёшлар дафтари»га киритилган ишсиз ёшларни ишга қабул қилган тадбиркорлик субъектларига давлат мулкини ижарага олишда ижара тўловларидан имтиёзлар тақдим этилади.

Деҳқон хўжалиги билан шуғулланувчи ёшларга субсидиялар берилади

«Ёшлар дафтари»га киритилган деҳқон хўжалиги фаолияти билан шуғулланаётган ёшларга «Ёшлар дафтари», «Темир дафтар» ҳамда «Aёллар дафтари» жамғармалари ҳисобидан уруғликлар ва кўчатларни харид қилиш учун БҲМнинг 8 баравари миқдоригача субсидия ажратилади.

Ўсимлик ёғи йил охиригача ҚҚСдан озод қилинади

Тегишли қонун билан, Ўзбекистон Республикаси ҳудудига ўсимлик ёғи, кунгабоқар ва зиғир уруғи, шунингдек, соя данагини олиб кириш, ўсимлик ёғини ишлаб чиқариш ва (ёки) реализация қилиш бўйича айланмалар ҚҚСдан озод қилинади.

Шунингдек, 2021 йил 1 майдан 31 декабрга қадар бўлган даврда кунгабоқар ва пахта уруғлари, кунгабоқар ёғи ва пахта ёғи маҳсулотларига нисбатан экспорт божи жорий этилди.

Бўстонлиқ туманида алоҳида тартибда солиқ солиш тартибининг синов муддати якунланади

Ҳукумат қарорига мувофиқ, 2020 йил 1 майдан 2021 йил 1 майгача Бўстонлиқ туманида тажриба тариқасида солиқ солиш объектларини ҳисобга олиш ва солиқ маъмуриятчилигининг алоҳида тартиби жорий этилганди.

Тажриба даврида жисмоний шахслар томонидан дам олиш уйлари, дала ҳовли, якка тартибдаги уй-жойлар ва яшаш учун мўлжалланган бошқа турар жойлар, шунингдек, айрим мол-мулк турлари солиқ органларининг таянч пунктлари томонидан солиқ солиш объектларининг ҳисобга қўйилгани тўғрисидаги бепул бериладиган гувоҳнома асосида ижарага берилиши кўзда тутилганди. 1 майдан тажриба даври якунланди.

 

Конимех туман адлия бўлими

May 3, 2021

Ёшлар саноат ва тадбиркорлик зонасида тадбиркорлик фаолиятини бошлаши ва юритишлари учун ёшларга 5 сотихдан 10 сотихгача ер майдонлари аукционсиз ажратилади.

Президент томонидан 21.04.2021 йилдаги «Ёшлар саноат ва тадбиркорлик зоналари фаолиятини ташкил этиш ҳамда ёшларнинг тадбиркорликка оид ташаббусларини қўллаб-қувватлаш чора-тадбирлари тўғрисида»ги қарор имзоланди.

 

Ҳужжатга мувофиқ қуйидагилар ташкил этилади:

  • белгиланган ҳудудларда ёшлар саноат ва тадбиркорлик зоналарини (кейинги ўринларда – Ёшлар саноат зоналари);
  • Инвестициялар ва ташқи савдо вазирлигида юридик шахс мақомига эга бўлмаган Ёш тадбиркорларни қўллаб-қувватлаш жамғармаси (кейинги ўринларда – Жамғарма).

Ёшлар саноат зоналарининг асосий вазифалари этиб қуйидагилар белгиланди:

  • ёшларга тадбиркорлик фаолиятини бошлаши ва юритишлари учун Ёшлар саноат зоналари ҳудудида ишлаб чиқариш майдонлари тақдим этиш орқали уларни тадбиркорлик фаолиятига кенг жалб қилиш;
  • ёшларга уларнинг саноат ва хизмат кўрсатиш йўналишидаги лойиҳалари, ташаббуслари ва ғоялари амалга оширилишида кўмаклашиш ва қулай шарт-шароитлар яратиш;
  • «стартаплар» ташкил этиш мақсадида бизнес-инкубатор вазифаларини амалга ошириш, ёш тадбиркорлик субъектларининг фаолиятини барқарор ривожлантириш ва рақобатбардошлигини ошириш;
  • ёшларга ўз инновацион ишланмаларини ишлаб чиқариш жараёнига жорий этиш ва натижаларини тижоратлаштириш, йирик саноат корхоналари билан кооперация алоқаларини ўрнатиш борасида амалий ёрдам кўрсатиш;
  • банд бўлмаган, шу жумладан «Ёшлар дафтарига киритилган ёшларни иш билан таъминлаш ва уларнинг ижтимоий-иқтисодий фаоллигини ошириш.

Ёшлар саноат зоналари муҳандислик-техник коммуникациялари мавжуд бўлган ёки ўтказиш осон бўлган, фаолият кўрсатмаётган ишлаб чиқариш майдонлари ва қишлоқ хўжалигига мўлжалланмаган ер майдонларида ташкил этилади. Ёшлар саноат зоналарига жойлаштириш учун инвестиция лойиҳалари туман (шаҳар) ҳокимлари раҳбарлигида тузилган ишчи гуруҳлари томонидан танлаб олинади.

Ёшлар саноат зоналари ҳудудида майдони 1 000 кв.м гача бўлган ер участкалари, истисно тариқасида, электрон аукцион савдоси ўтказмасдан, халқ депутатлари туман (шаҳар) Кенгашларининг қарори билан ажратилади. Бунда бўш бино ва иншоотлар (давлат кўчмас мулк объектлари) шартнома асосида ҳар йили Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан давлат кўчмас мулкидан фойдаланганлик учун белгиланадиган ижара тўловининг энг кам миқдоридан ошмаган ставкаларида ижарага берилади.

Жамғарма маблағлари қуйидагиларга сарфланади:

  • ташқи бозорларда талаб юқори бўлган ва импортнинг ўрнини босувчи, юқори қўшилган қийматли маҳсулотлар ишлаб чиқариш бўйича замонавий ишлаб чиқаришларни ташкил этишга ҳамда хизматлар кўрсатиш соҳасидаги лойиҳаларни молиялаштиришга;
  • мева-сабзавот ва қишлоқ хўжалиги маҳсулотларини чуқур қайта ишлаш, сақлаш ва қадоқлаш, тўқимачилик, пойабзал ва чарм-галантерея, кимё, фармацевтика, озиқ-овқат, электротехника саноати, машинасозлик, замонавий қурилиш материаллари, ҳунармандчилик ҳамда АКТ соҳаларидаги лойиҳаларни молиялаштириш ва бошқа йўналишларда янги замонавий ишлаб чиқаришларни ташкил этишга;
  • маҳаллий хом ашё ва материаллар негизида мустаҳкам кооперация алоқаларини ўрнатишга ҳамда юқори технологияли маҳсулотлар ишлаб чиқаришни маҳаллийлаштириш жараёнларини чуқурлаштириш соҳасидаги лойиҳаларни молиялаштиришга.

Жамғарма маблағларини шакллантириш манбалари этиб қуйидагилар белгиланди:

  • Тикланиш ва тараққиёт жамғармаси маблағлари ҳисобидан қайтармаслик шарти билан ажратиладиган 100 млн АҚШ доллари;
  • халқаро молия институтлари, хорижий ҳукумат молия ташкилотлари, хорижий банклар ва хусусий молия компанияларининг қарзлари;
  • Жамғарманинг бўш турган маблағларини тижорат банклари депозитларига белгиланган тартибда жойлаштиришдан тушадиган даромадлар;
  • қонунчилик ҳужжатларида тақиқланмаган бошқа манбалар.

Жамғарма маблағлари ҳисобидан молиялаштириладиган инвестиция лойиҳалари доирасида:

  • молиявий ресурслар тижорат банклари томонидан бир ёш тадбиркорлик субъекти учун бир йўла 100 минг АҚШ доллари эквивалентидан ошмаган миқдорда 7 йилгача муддат билан тақдим этилади;
  • қиймати 100 минг АҚШ доллари эквивалентигача бўлган инвестиция лойиҳалари Жамғарма маблағлари ҳисобидан молиялаштирилади;
  • тижорат банкларига инвестиция лойиҳаларини молиялаштириш учун молиявий ресурслар Жамғарманинг мавжуд маблағлари доирасида, миллий валютадаги кредитлар бўйича йиллик 10%, хорижий валютадаги кредитлар бўйича йиллик 2% ставкалари билан тақдим этилади;
  • тижорат банклари миллий валютадаги кредитларни ўз маржаси миқдорини 4%дан оширмасдан йиллик 14%, хорижий валютадаги кредитларни – ўз маржаси миқдорини 1%дан оширмасдан йиллик фоиз ставкасини 3% миқдорида белгилаган ҳолда ажратади. Тижорат банклари ажратилган молиявий ресурсларнинг мақсадли фойдаланилиши ва тўлиқ қайтарилишини доимий мониторинг қилиб боради.

Шунингдек Ёшлар саноат ва тадбиркорлик зоналарини йўл-транспорт, муҳандислик-коммуникация инфратузилмаси билан таъминлашнинг манзилли дастури тасдиқланди.

 Ҳужжат 22.04.2021 йилда «Халқ сўзи» газетасида чоп этилган.

Наргиза Воҳидова.

May 3, 2021

«Манчестер Юнайтед» мухлислари клуб раҳбариятидан норози эканини билдириб намойишга чиқмоқда. «Қизил иблислар» жамоасининг «Ливерпул»га қарши ўйини қолдирилди. Европа Суперлигасига олиб чиқиш ҳаракати мухлисларга ёқмаяпти.

Хабарларга кўра, бир қанча мухлис майдон ичига киришга муваффақ бўлган. Минглаб одамлар эса стадион ташқарисида тўпланиб, тартибсизликларни юзага келтирди.

Шунингдек, «Old Trafford»даги мухлислар полиция билан жанжаллашиб кетган.

Мунозаралардан сўнг, «Манчестер Юнайтед» клуби раҳбарияти ўйин қолдирилгани ҳақида эълон қилди.

«МЮ» ва «Ливерпул» футболчилари стадионга бормасликка қарор қилган. Чунки мамлакат фуқаролари намойишлар ўтказаётган эди.

May 3, 2021

Ўзбекистонда Бундан деярли бир йил аввал, аниқроғи, 2020 йил февраль ойида жамиятдаги ижтимоий муаммоларга комплекс ёндашувчи янги давлат ташкилоти — Маҳалла ва оилани қўллаб-қувватлаш вазирлиги ташкил этилган эди. Вазирлик ишга тушганидан кейинги даврда мамлакатда яна 34 та янги маҳалла ташкил этилди, соҳа учун зарур бўлган «Маҳалла ва оила» илмий-тадқиқот институти иш бошлади ва ҳоказо.

Қуйида Маҳалла ва оилани қўллаб-қувватлаш вазирлиги томонидан «Дарё»га тақдим этилган рақамлар иш кўламини янада аниқроқ кўришга имкон беради.

Оилаларни мустаҳкамлаш, хотин-қизларни ижтимоий қўллаб-қувватлаш

Ушбу йўналишда вилоятлар ва туман (шаҳар)ларда Хотин-қизлар жамоатчилик кенгашлари фаолияти йўлга қўйилди. Намунали оила мезонларини ҳаётга жорий этиш, оилаларда маънавий-ахлоқий қадриятларни мустаҳкамлаш мақсадида «Ёшларни оилавий ҳаётга тайёрлаш марказлари» иш бошлади. Бу чора-тадбирлар самараси ўлароқ, ажралиш ёқасига келиб қолган 20 952 оила яраштирилди, 12 851 оиланинг никоҳи қонунийлаштирилди, оилавий ажралишлар 3 559 тага камайишга эришилди.

Корхона, ташкилот ва муассасаларда 34 088 та хотин-қизлар бошланғич ташкилотлари тузилди. 99 100 нафар хотин-қизларнинг бандлиги таъминланди. 41 110 нафар хотин-қизларнинг тадбиркорлик фаолияти йўлга қўйилди. 14 мингдан зиёд хотин-қизлар доимий ишга, 179,9 минг нафари ҳақ тўланадиган жамоат ишларига, 4,4 минг нафари тадбиркорлик соҳаларига жалб этилди.

Фото: Президент матбуот хизмати
11 минг нафар хотин-қизларга банклар томонидан 1 триллион сўмдан ортиқ кредитлар ажратилишига кўмаклашилди. 3 335 нафар хотин-қизларнинг кичик бизнес лойиҳалари учун Хотин-қизларни ва оилани қўллаб-қувватлаш жамғармаси томонидан жами 70 миллиард 922 миллион сўм миқдорида маблағ ажратилди.

Ҳудудий хотин-қизлар тадбиркорлик марказлари томонидан 39 600 нафар аёллар тикувчилик, пазандачилик, тадбиркорлик кўникмалари каби йўналишлар бўйича ўқув курсларида ўқитилди. 26 247 нафар хотин-қизлар касбга ўқитиш марказларида касбга тайёрланди. 17 448 нафар хотин-қизлар ҳунармандчилик, 12 101 нафари касаначилик соҳаларига жалб этилди. 4 873 нафар хотин-қизлар маҳаллалардаги тажрибали уста-ҳунармандларга бириктирилди ва касб-ҳунарга ўргатилди.

1 246 нафар хотин-қизларга уй-жой сотиб олиш учун Хотин-қизларни ва оилани қўллаб-қувватлаш жамғармаси ҳисобидан 21 миллиард 746 миллион сўм миқдоридаги бошланғич бадаллар тўлаб берилди. 57 217 нафар аёлларга ҳуқуқий, психологик ва тиббий ёрдамлар кўрсатилди.

Хотин-қизларни ва оилани қўллаб-қувватлаш жамғармаси ҳисобидан ногиронлиги бўлган 2 425 нафар хотин-қизларга 1,9 миллиард сўмдан ортиқ маблағлар эвазига ногиронлик аравачаси, эшитиш мосламаси ва бошқа реабилитация воситалари берилди. 18 628 нафар хотин-қизларга олий таълим муассасаларига давлат гранти асосида қабул кўрсаткичлари доирасида танловда иштирок этишлари учун тавсияномалар берилди, шундан 950 нафари олий таълим муассасаларига грант асосида ўқишга қабул қилинди.

Зўрлик ишлатишдан жабр кўрган шахсларни реабилитация қилиш ва мослаштириш марказларига мурожаат қилган 14 849 нафар фуқародан
5 796 нафарига психологик, 3 680 нафарига ҳуқуқий, 503 нафарига тиббий ёрдам кўрсатилди, 1 553 нафарининг бандлиги таъминланди. Тазйиқ ва зўравонликдан жабр кўрган 17 917 нафар хотин-қизларга «ҳимоя ордери» берилди.

Узоқ муддат бола парваришида бўлган оғир шароитда яшаётган 22 459 нафар аёлларнинг манзилли рўйхатлари шакллантирилди, уларнинг 2 767 нафари тикувчиликка, 1 219 нафари пазандачиликка, 1 353 нафари ҳунармандчиликка ўқитилди, 1 541 нафари бўш вакант иш ўринларига жойлаштирилди, 4 278 нафари жамоат ишларига жалб қилинди, 2 391 нафари ўзини ўзи банд қилиб, меҳнат гувоҳномалари расмийлаштирилди, 2 641 нафари бошқа ишларга жалб қилинди.

Фото: Президент матбуот хизмати
2020 йил октябрь—декабрь ойларида 6,38 миллиондан хотин-қизлар билан ўтказилган мулоқотлар натижасида 433 мингга яқин киши «Аёллар дафтари»га киритилди. Маҳалла ва оилани қўллаб-қувватлаш вазирлигидан маълум қилишларича, ҳозирга қадар «Аёллар дафтари»га киритилган 80 175 нафар (19 фоизи) хотин-қизларнинг муаммолари ҳал этилган.

177 та туман, шаҳарларда хотин-қизлар муаммоларини ўрганиш ва уларни умумлаштириш учун «сектор – туман – вилоят» даражасида 198 та штаблар ташкил этилган. 7 842 та маҳалладаги 5 млн 473 минг 187 та хонадонда яшовчи 30 ёшдан юқори бўлган 5 млн 363 минг 640 нафар хотин-қизлар билан суҳбатлар ўтказилиб, ҳозирда барча анкеталарнинг электрон базаси шакллантирилмоқда.

«Маҳалла ва оила» илмий-тадқиқот институти томонидан шу даврга қадар оилаларда маънавий-ахлоқий қадриятларни мустаҳкамлаш, оғир вазиятга тушган оилалар билан ишлаш, суицид ҳолатларини олдини олиш, ёшлар орасида тадбиркорлик муҳити ва маданиятини шакллантиришга қаратилган 5 та ўқув-услубий қўлланма тайёрланди.

Жиноятчиликни олдини олиш, хавфсиз маҳалла тизимини шакллантириш:

Профилактика инспектори лавозими бўйича қўшимча 2 573 та штат бирлиги жорий этилди ва барча маҳаллаларда улар фаолияти йўлга қўйилди. Криминоген вазияти оғир бўлган 961 та ҳудудларда «маҳаллабай» дастурлар ишлаб чиқилди ҳамда Миллий гвардия ходимлари бириктирилди.

Фото: Президент матбуот хизмати
Маҳаллалар фаолияти билан боғлиқ бўлмаган 126 та жиноят 78 тага қисқартирилди ва олди олиниши мумкин бўлган 48 та жиноят қолдирилди. Бу ишлар натижасида 9 168 та маҳалланинг 4 488 тасида жиноят содир этилишига йўл қўйилмади, 1551 тасида жиноятчилик камайишига эришилди.
Низоли оилалардаги муҳитни соғломлаштириш борасидаги ишлар натижасида 19 967 та оиланинг нотинчлигига барҳам берилди. 313 178 та объектга видеокузатув камералари ўрнатилиши ташкил этилди. 240 нафар қидирувдаги шахслар ушланди, 3 824 та жиноят улар томонидан фош этилди.
8 615 нафар шахслар реабилитация марказларига жойлаштирилди. 4 956 нафар қаровсиз вояга етмаганлар ижтимоий-ҳуқуқий ёрдам кўрсатиш марказларига жойлаштирилди. Профилактик ҳисобда турган 2 190 нафар аёлларга шахсини тасдиқловчи ҳужжатларни қайта тиклашда кўмаклашилди. Профилактик ҳисобда турган 4 014 нафар вояга етмаганлар профилактик ҳисобдан чиқарилди.

Аҳоли бандлигини таъминлаш

Бандлик ва меҳнат муносабатлари вазирлиги билан ҳамкорликда 1,08 миллиондан зиёд фуқаронинг бандлиги таъминланди, 519,2 минг нафари жамоат ишларига жалб қилинди, 71,9 минг ортиқ шахсга ишсизлик нафақалари тайинланди. 371,2 минг нафар фуқарога ўзини ўзи банд қилиш орқали уларга вақтинчалик меҳнат гувоҳномалари расмийлаштиришга кўмаклашилди.
70 173 нафар фуқаролар ҳунармандчилик, оилавий тадбиркорлик, касаначилик, томорқа билан шуғулланиш каби йўналишларга жалб этилди. Оилавий тадбиркорликни ривожлантириш бўйича 187 610 нафар фуқарога кредит олишга, 41 230 нафарига субсидиялар ажратишга кўмаклашилди.

Фото: Президент матбуот хизмати
Ташқи меҳнат миграцияси агентлиги билан ҳамкорликда 467 минг 079 нафар меҳнат миграциясидан қайтиб келган фуқаролардан 268 минг 267 нафарининг бандлигини таъминлашга кўмаклашилди.
Аҳолининг томорқа ерларида 305,4 минг гектар эртаки, 241,3 минг гектар такрорий экин, 162,3 минг гектар тўқсонбости услида пиёз, саримсоқ пиёз ва совуққа чидамли экинлар экиш ташкил этилди. 244,7 минг аҳоли томорқаларида жами 6,9 минг гектар майдондан иборат иссиқхоналар барпо этилди.

751 539 та имконияти чекланган оилалар хонадонларининг 28,8 минг гектар ер майдонига картошка, полиз ва сабзавот экинларини экишда ҳамда 15,3 мингта хонадонда жами 651,4 гектар майдонда иссиқхона қуриш ва қишлоқ хўжалиги маҳсулотларини етиштиришда амалий ёрдам кўрсатилди. Давлат дастури асосида 10 641 нафар фуқарога жами 5 847,9 гектар қишлоқ хўжалиги оборотидан чиқиб кетган ерлар қишлоқ хўжаликлари маҳсулотларини етиштириш учун тақсимлаб берилди ҳамда 198 та қишлоқ хўжалиги кооперацияларига бириктирилди.

Пандемия шароитида 163 408 та эҳтиёжманд оилага ғалладан бўшаган ерлардан 64 808,1 гектар ер майдони такрорий экин экиш учун ажратилди. «Бир маҳалла – бир маҳсулот» тамойили асосида 1254 та маҳалла сабзавотчиликка, 359 та маҳалла картошкачиликка, 86 та маҳалла полизчиликка, 746 та маҳалла боғдорчиликка, 132 та маҳалла лимончиликка, 443 та маҳалла чорвачиликка, 134 та маҳалла паррандачиликка, 44 та маҳалла асаларичиликка, 4 та маҳалла қуёнчиликка ихтисослаштирилди.

Фото: Президент матбуот хизмати
Енгил конструкцияли иссиқхоналар ўрнатиш учун 2 548 та хонадонга 16,4 миллиард сўм субсидия; суғориш воситаларини харид қилиш учун 379 та хонадонга 1,6 миллиард сўм, уруғликлар ва кўчатлар сотиб олиш учун 162 та хонадонга 222,2 миллион сўм миқдорда кредит ажратишда кўмаклашилди.

Сув таъминоти оғир бўлган шаҳар ва туманлар 104 та туман ва шаҳалардардаги 956 та маҳалла фуқаролар йиғинларда 1 215 та вертикал суғориш қудуқлари қазиб берилди. Фуқаролар йиғинлари ҳудудларида 6,6 млн. дона мевали ва 5,4 млн. дона манзарали дарахт кўчатлари экилди ва маҳалла ҳудудларида жами 7,6 минг гектар майдонда кичик боғлар яратилди.
Бу ишлар натижаси ўлароқ, кам таъминланган 174 258 та оилани «Темир дафтар»дан чиқаришга эришилди.

Юқорида келтирилган рақамлар — вазирлик томонидан бир йилда амалга оширилган салмоқли ишларнинг бир қисми, холос. Жумладан, пандемия оқибатида даромадидан айрилган аҳолига ва Сардоба сув тошқинидан жабр кўрганларга кўрсатилган ёрдам ҳам алоҳида бир катта мавзу. Бироқ бу ҳақда бошқа сафар.

May 3, 2021

Навоий вилояти ҳокими Қобул Турсунов вилоят марказидан 300 километр узоқликда жойлашган Учқудуқ туманида бўлиб, ҳудудда фаолият олиб бораётган тадбиркорлар билан учрашди.

Бугунги тадбиркор ислоҳотчи, ҳудуднинг ижтимоий-иқтисодий ривожланишида муҳим куч эканлигини барча яхши тушуниб етмоқда. Зеро, тадбиркорларнинг юрт фаровонлигини таъминлашдаги ҳиссаси беқиёс.

Вилоят ҳокими тадбиркорлар билан учрашувда уларга яқиндан кўмакдош эканлигини таъкидлади. Тадбиркорларнинг мурожаат ва таклифлари тингланиб, уларни қийнаб келаётган масалаларга ечим изланди.

– Тадбиркорлар учун доимо барча эшиклар очиқ, – дейди вилоят раҳбари. – Ҳар қандай масалада ҳудуд раҳбарларидан тортиб, менгача бемалол мурожаат қилишлари мумкин. Мурожаатлар энди ечилмасдан, ҳал этилмасдан қолмайди. Биз уларга ёрдамчи эканлигимизни амалда кўрсатишимиз керак.

Мазкур мулоқотда Обид Ҳамроев, Лайло Каримова, Шерзод Юсупов кредит, марказий коммунал тармоқларига уланиш сингари масалаларда вилоят раҳбарига мурожаат қилди.

Тадбиркорларнинг ҳар бир таклифи мутасадди идоралар вакиллари, бошқармалар ҳамда масалага даҳлдор корхона, ташкилот раҳбарлари иштирокида таҳлил этилиб, уларнинг аксарияти ижобий ҳал этилди.

Шунингдек, вилоят раҳбари туманда барпо этилаётган ёшлар саноат зонасида бўлиб, бу ерда ташкил этиладиган лойиҳалар билан танишди.

Учқудуқ ёшлар саноат зонасида 10 гектар майдонда 60 та лойиҳа амалга оширилади.

Абдували Бўриев, ЎзА

May 2, 2021

Маҳалла ва оилани қўллаб-қувватлаш вазирининг ўринбосари Ботир Рахматович Парпиев обод қишлоқда

Учтепа қишлоғи – Навоий вилояти марказидан 270 километр, Конимех тумани марказидан 240 километр олисда, қўшни Қозоғистон билан чегара ҳудудда жойлашган. Бу масканни ўзига ватан ичра кичик ватан деб билган, бир оила фарзандларидек аҳил ва иноқликда яшаб, Ўзбекистонимиз чорвачилиги равнақига муносиб ҳисса қўшиб келаётган ўзбек, қозоқ, қорақалпоқ ва бошқа миллатларга мансуб юртдошларимиз юз-кўзидаги қувончнинг, юракларни лиммо-лим тўлдириб, жўшқин дарёдек тошиб чиқаётган зўр кўтаринкилик ва шукроналик кайфиятининг чеку-чегараси йўқ бугун.

Давлатимиз раҳбари ташаббуси билан ҳаётга изчил татбиқ этилаётган “Обод қишлоқ” дастури натижасида янги қиёфага кирган юзлаб маҳалла ва қишлоқлар қаторидан энди мазкур аҳоли маскани ҳам жой олди. Мазмун ва моҳияти жиҳатидан ниҳоятда кенг кўламга эга бўлган ушбу дастур шарофати билан қишлоқда яшаётган қарийб 1,5 минг аҳоли ҳаётида мўъжизага тенг ўзгаришлар юз бермоқда.

Мана бир йилдирки, бутун дунё давлатлари каби мамлакатимиз олдида пайдо бўлган мураккаб муаммо ва қийинчиликлар, дуч келинган турли синовларга қарамасдан, юқори суръатларда олиб борилаётган катта ҳажмдаги қурилиш-таъмирлаш, ободонлаштириш ва кўкаламзорлаштириш ишлари туфайли “Учтепа” бамисоли мўъжаз шаҳарча кўринишини олмоқда.

Янгиланаётган Ўзбекистоннинг янгиланган қишлоғида амалга оширилган бунёдкорлик ишлари, бу ерда барпо этилаётган кўплаб ижтимоий соҳа объектлари, замонавий уй-жойлар юртимиздаги халқпарвар сиёсатнинг, она заминимизда яшаётган барча миллат ва элат вакилларига кўрсатилаётган бирдек эътибор ва ғамхўрликнинг яна бир амалий ифодаси бўлди.

Ўзбекистонда ҳукм сураётган ўзаро меҳр-оқибат, ҳамжиҳатлик, тотувлик, бағрикенглик муҳитини янада мустаҳкамлашга ҳисса қўшадиган янги объектларни фойдаланишга топширишга бағишланган тадбирлар том маънодаги тантаналарга айланмоқда. Давлат ва жамоат ташкилотлари, сектор раҳбарлари  жам бўлган ушбу учрашувда Маҳалла ва оилани қўллаб-қувватлаш вазирининг ўринбосари ҳам иштирок этиб, овул қувончига шерик бўлгани унга алоҳида руҳ бахш этди.

  Маҳалла ва оилани қўллабқувватлаш вазирининг ўринбосари: Ботир Рахматович Парпиев –“Мен кўрганларимдан ҳайратдаман. Бу Ўзбекистон Президенти Шавкат Мирзиёевнинг қишлоқларни ислох қилиш ғоясини ажойиб тарзда амалга ошираётганининг тасдиғидир. Мен бу жойга биринчи бор келяпман. Менимча, бу мутлақо бошқа маскан. Қизилқум устида жойлашган қишлоқ шароитларига мос шинам уйлар, ҳамма қулайликлар бир жойга жамланган, аҳолининг манфаатларига мос келади. Ёшларнинг спортга бўлган иштиёқини кўрдим. Биласизми, бу каби овулларини ҳар жойда ҳам учратавермайсиз. Шуни алоҳида таъкидламоқчиманки, бу ерда турли миллат вакиллари истиқомат қилар экан. Улар биргаликда тинч-тотув, дўст бўлиб бир-бирларини қўллаб-қувватлаб келмоқдалар. Бу эса мамлакатдаги тинчлик-осойишталикнинг асосидир”, — деди.

Овулда “Обод ва хавфсиз маҳалла” ҳамда “Маҳалла раиси – ислоҳотчи” тамойиллари асосида фуқаролар билан ишлаш, ижтимоий муаммоларни ҳал қилиш бўйича янги тизимни самарали жорий этиш учун барча имконият яратилган. Овулда маҳалла фуқаролар йиғини раиси, унинг ўринбосар ва турли йўналишлар бўйича маслаҳатчилари, профилактика инспектори ўзаро уйғун ва самарали фаолият кўрсатиши учун барча шароит муҳайё қилинган.

1 ва 2-секторлар штаби, тиббиёт пункти филиали каби одамларга максимал даражада қулайлик яратишга хизмат қиладиган объектлар ташкил этилган. Меҳмонлар шароитлар билан танишар экан, мамлакатимизда маҳалла ва оилани қўллаб-қувватлаш, икки институтни уйғун ривожлантириш борасидаги ислоҳотларнинг чекка бир қишлоқдаги натижасига юқори баҳо берди.

 Юртбошимизнинг 2018 йилда чиқарган “Обод маҳалла, Обод қишлоқ” дастурига биноан бугун “Учтепа” қишлоғи катта совғага эришди. Бу қишлоқ янгича қиёфага айланди десак муболаға бўлмайди. Юртимизнинг энг катта бойлиги, бу тинчлик, осойишталик. Миллатлараро тотувлик Ўзбекистонда давлатимиз раҳбарияти эътиборида.

“Янги Ўзбекистон остонаси мактабдан бошланади” ғояси “Учтепа” қишлоғи ҳаётида ҳам мустаҳкам қарор топди. “Обод қишлоқ” дастури доирасида қишлоқдаги 240 ўринли 8-умумий ўрта таълим мактаби тўлиқ таъмирланиб, қўшимча равишда 120 ўринли бино қурилиб, замонавий асосда жиҳозланади. Бу мактабда таълим қозоқ тилида олиб борилади.

Аниқ рақамларга мурожаат қилсак: “Обод қишлоқ” дастури доирасида 2 та нуқтада 300 метр ер қаъридан чучук сув чиқарилиб, 14.6 км. сув тармоғи ҳар бир хонадонга тортилади, 2 та ичимлик суви объекти мукаммал таъмирланади. Натижада, 6 та ичимлик суви объекти тўлиқ қувватда ишга тушиб, “Учтепа” овул фуқаролар йиғинидаги 1.5 мингдан ортиқ аҳоли оби ҳаёт билан таъминланади.

Аслида ҳам эзгулик миллат-у тил танламайди. Эзгу ният, эзгу сўз, эзгу амал бирлашган нуқтада бунёдкорлик қудрати ўз сўзини айтади. Дилларни дилларга пайванд этадиган ҳам, инсонларни буюк мақсадлар йўлида бирлаштирадиган ҳам, одамзот ҳаётининг мазмуни ҳам фақат ва фақат эзгуликдир.

 

Конимех туман ҳокимлиги Ахборот хизмати.

 

May 2, 2021

Қизилқумдаги обод қишлоқ

Мамлакатимизда барча соҳа ва тармоқларда олиб борилаётган туб ислоҳотлардан кўзланган бош мақсад халқимизнинг ҳаётий талаб ҳамда эҳтиёжларини таъминлаш, одамларимизни рози қилишдан иборатдир.

Бу эзгу ният йўлида амалга оширилаётган салмоқли ишлар кўлами кундан-кунга янада ортиб, янги маъно ва мазмун билан бойиб бормоқда. Президент Шавкат Мирзиёев ташаббуси билан ҳаётга жорий этилган бу тизим — “Обод қишлоқ” дастури қишлоқларимиз, айниқса, олис ҳамда чекка ҳудудларда яшаётган миллионлаб юртдошларимиз ҳаётида чин маънода янги саҳифа очишга қаратилгани билан аҳамиятлидир.

Ўзбекистон Ркспубликаси Президентининг “2017-2021 йилларда Ўзбекистон Республикасини ривожлантиришнинг бешта устивор йўналиши бўйича Ҳаракатлар стратегияси “Ёшларни қўллаб-қувватлаш ва аҳоли саломатлигини мустаҳкамлаш йили”да амалга оширишга оид давлат дастури тўғрисида”ги 2021 йил 3 февраль ПФ-6155-сон Фармони ижросини таъминлаш ҳамда “Обод қишлоқ” ва “Обод маҳалла” Дастурларини узвий давом эттириш орқали ҳудудларнинг йўл транспорт инфратузилмаси, муҳандислик-коммуникация тармоқлари ва ижтимоий соҳа объектларини барпо этиш ҳамда у асосида аҳолининг фаровонлиги ва турмуш тарзини янада юксалтириш мақсадида, Навоий вилоятининг Конимех тумандаги 2 та “Учтепа” ОФЙ ҳамда “Янгиғазҳон” ОФЙнинг “Пахтакор” овули киритилди.

Конимех туманининг Учтепа қишлоғида “Обод қишлоқ” дастури доирасида амалга оширилаётган ишлар жумладан, Конимех тумани “Учтепа” ОФЙда йўл транспорт инфратузилмаси, муҳандислик-коммуникация тармоқлари ва ижтимоий соҳа объектларини барпо этиш  ишларига 250 нафар хашарчилар ва 25 та махсус автомобиллар жалб этилган бўлиб, ички йўлларнинг қурилиши ва мукаммал таъмирлаш учун 7,5 км масофадаги кўчаларга шағал ётқизиш ишлари олиб борилмоқда.

Қабристонда ободонлаштириш, кўкаламзорлаштириш ишлари ташкил қилинмоқда. Хотира майдонини мукаммал таъмирлаш ва оғир шароитда яшаётган ёрдамга муҳтож оилалаларнинг хонадонлари атрофи уралиб, фасад қисми  таъмирлаб берилмоқда.

Ичимлик ва оқава суви таъминотини ривожлантириш дастури доирасида 14.6 км масофадаги ичимлик суви тармоқларини тортиш,  газ таъминотини яхшилаш тармоқ дастурлари доирасида қўшимча 45 дона газ балон график асосида етказиб берилмоқда.

Электр таъминотини яхшилаш тармоқ дастури асосида эса 9.6 км демонташ ва реконстркуция ишлари амалга оширилмоқда. 8-сон мактаб биноси реконструкция ва (120 ўринли блок қуриш) ҳамда Маданият марказини мукаммал таъмирлаш асосида Маданият ва Маҳалла биносига мослаштириш ишлари жадаллик билан амалга оширилмоқда.

Конимех тумани ҳокимлиги Ахборот хизмати.

Aprel 30, 2021

Қонунга кўра, Конституциявий суд доимий фаолият юритувчи суд ҳокимияти органи бўлиб, қонун чиқарувчи ва ижро этувчи ҳокимият ҳужжатларининг Конституцияга мувофиқлиги тўғрисидаги ишларни кўради.

Конституциявий суд конституциявий ҳуқуқ ва эркинликлари муайян ишда қўлланилган ва Конституцияга мувофиқ бўлмаган қонунда бузилган деб ҳисобловчи фуқаролар ҳамда юридик шахсларнинг шикоятларини ҳам кўриб чиқиши белгиланди.

Конституциявий суд раис ва унинг ўринбосарини қўшган ҳолда 9 нафар судьядан иборат бўлади (Илгари 7 нафар эди).

Конституциявий судга мурожаат қилиш ҳуқуқига эга бўлган субъектлар қаторига қуйидагилар киритилди:

  • Инсон ҳуқуқлари бўйича вакил (омбудсман) ўринбосари – Бола ҳуқуқлари бўйича вакил;
  • Инсон ҳуқуқлари бўйича Ўзбекистон Республикасининг Миллий маркази;
  • Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил.

Фуқаролар ва юридик шахслар қонун уларнинг конституциявий ҳуқуқлари ва эркинликларини бузмоқда деб ҳисобласа ҳамда судда кўрилиши тугалланган муайян ишда қўлланилган бўлса ва судда ҳимоя қилишнинг барча бошқа воситаларидан фойдаланиб бўлинган бўлса, қонуннинг Конституцияга мувофиқлигини текшириш тўғрисидаги шикоят билан Конституциявий судга мурожаат этишга ҳақли.

Aprel 30, 2021

Қарорга кўра, Миллий гвардия ходимлари Миллий гвардия тизимидаги таълим муассасалари ва бошқа муассасаларнинг кундузги ва сиртқи таълим шаклида тайёрланади, Миллий гвардия ўқув марказларида белгиланган тартибда махсус касбий (бошланғич) тайёргарликдан ўтказилади.

Шунингдек, Миллий гвардия қўмондони тавсияси асосида олий ноюридик маълумотга эга бўлган ходимлар эгаллаб турган лавозими ва пул таъминоти сақлаб қолинган ҳолда Тошкент давлат юридик университетининг Ихтисослаштирилган филиалида қайта тайёрланади.

Қарорга кўра, пенсия олиш ҳуқуқини берадиган хизмат муддати 20 йилни ташкил этади, имтиёзли ҳисобланадиган давр ходимларга пенсия миқдори ҳисобланаётган вақтдагина инобатга олинади.

Миллий гвардия ходимларининг фарзандлари давлат мактабгача таълим ташкилотларига яшаш ёки хизматни ўташ жойи бўйича қабул қилинади.

Шунингдек, Миллий гвардиянинг хизмат интизоми ва бенуқсон узлуксиз хизмати учун ташаббускор ва виждонли ходимларни тақдирлаш мақсадида “Ўзбекистон Республикаси Миллий гвардиясининг фидойи ходими” идоравий кўкрак нишони таъсис этилди.

Қарор билан Миллий гвардия ходимларининг хизмат ўташ тартиби тўғрисидаги низом тасдиқланди.

Низомга кўра, хизматга ихтиёрий равишда ёши 18 дан кичик ва 30 дан катта бўлмаган, шу жумладан 30 ёшда Қўриқлаш бош бошқармаси ҳарбийлаштирилган соқчилик бўлинмаларининг тегишли касбий тайёргарликка эга, тайёргарлик машғулотлари ва танлов босқичларидан ўтган ишчи ва хизматчилари орасидан (бундан тор доирадаги мутахассисликка эга бўлган номзодлар мустасно) танлаб олиш орқали Ўзбекистон фуқаролари қабул қилинади.

Номзод доимий яшаш жойи бўйича рўйхатга олинган жойидаги Миллий гвардия бўлинмаларига тегишли ҳужжатларни тақдим этади.

Aprel 15, 2021

Расмий муносабат

                   Ижтимоий тармоқларнинг бирида Конимех тумани ҳокими Мурод Эгамқулов қўл остида фаолият олиб борадиган туман молия бўлими бош иқтисодчиси Комил Нуримбетов ҳокимнинг кўплаб ноқонуний ҳаракатларни амалга оширгани тўғрисида мурожаат қилган.
Ўрганишлар давомида шу аниқ бўлдики, ушбу фуқаро туман ҳокимига асоссиз айблов қуйгани маълум бўлди.

Ўзбекистон Республикаси Молия вазирлиги Давлат молиявий назорати Бош бошқармаси бош назоратчи- тафтишчиси У.Умаровнинг Навоий вилояти Конимех ҳокимиятининг 2017 йил 1 январдан 2019 йил 1 январигача бўлган даврдаги бюджет ва бюджетдан ташқари маблағларни шаклланиши ҳамда мақсадли ишлатилиши, йўналтирилиши юзасидан ўтказилган текшириши давомида ҳам фуқаро Комил Нуримбетов таъкидлаган фикрлар асоссиз эканлиги тасдиқланди.

Шунингдек, Ўзбекистон Республикаси МЖтК40- моддасида назарда тутилган маъмурий ҳуқуқбузарликни содир этган деб баҳоланиб, унга шу моддага асосан энг кам ойлик иш ҳақининг 30 баравари миқдорида жарима жазоси тайинланган.
Жарима давлат фойдасига ундирилган.

 

Конимех туман ҳокимлиги матбуот хизмати.

Spelling error report

The following text will be sent to our editors: