Hurmatli foydalanuvchilar! Sayt test rejimida, tarkibni to'ldirish bo'yicha ishlar olib borilmoqda. Noqulayliklar uchun uzr so'raymiz. Sayt ma'muriyati.
Iyun 7, 2021

Президент сайлови мамлакатимизни ривожлантиришнинг бешта муҳим устивор йўналиши бўйича Ҳаракатлар стратегиясида ўз ифодасини топган илғор демократик ғояларнинг амалдаги яна бир ёрқин ифодасидир.

Бу сайловда очиқлик, ошкоралик ва шаффофлик амалда кенг таъминланиши учун участка сайлов комиссияларидан то Марказий сайлов комиссиясигача – барча даражадаги сайлов комиссиялари, барча сайлов ташкилотчилари ўз ишини энг илғор демократик принциплар асосида ва юксак ташкилий даражада амалга оширишини тақозо қилади.

Маълумки, Ўзбекистон Республикаси сайлов қонунчилигига киритилган ўзгартишларга биноан энди Ўзбекистон Республикаси Президенти сайлови, Олий Мажлис Қонунчилик палатаси депутатлари, маҳаллий давлат ҳокимияти вакиллик органлари депутатлари сайлови уларнинг конституциявий ваколат муддати тугайдиган йилда – октябрь ойи учинчи ўн кунлигининг биринчи якшанбасида ўтказилади.

Аввало, сайловга тайёргарлик кўриш жараёнини ҳуқуқий ва услубий жиҳатдан таъминлаш, сайлов жараёни иштирокчиларининг сайлов қонунчилигига оид билим ва кўникмаларини мустаҳкамлаш борасидаги ишларни ўз вақтида ва самарали ташкил этиш муҳим аҳамиятга эга. Шу мақсадда барча округ ва участка сайлов комиссияларининг аъзолари учун семинарлар, тренинглар, ўқув машғулотлари, конференциялар, давра суҳбатлари бошқа тадбирлар, жумладан онлайн мулоқотлар, ўтказилади.

Ушбу вазифалардан келиб чиқиб, Жорий йилнинг 7 июнь куни Конимех тумани 4-сонли болалар мусиқа ва санъат мактабида Ўзбекистон Республикаси Президенти администрациясининг 2021 йил 10 майдаги 05-1-1624-сонли хати ва Ўзбекистон Республикаси Марказий сайлов комиссиясининг 2021 йил 27 апрелдаги 1069-сонли қарори ижроси юзасидан ўқув семинари бошланди.

Ўқув семинар жорий йилнинг 15 июн санасигача давом этади.

 

Iyun 7, 2021
 

Ўзбекистон Республикаси Президенти соврини учун анъанавий тарзда тадбиркорлар, фермерлар ва ҳунармандлар орасида ўтказиладиган «Ташаббус-2021» кўрик-танловини юқори даражада ташкил этиш ва ўтказиш тўғрисидаги Ўзбекистон Республикаси Вазирлар Маҳкамасининг 2019 йил 14 апрельдаги 278-ф-сонли фармойишига асосланиб, Навоий вилояти, Конимех тумани ҳокимлигида «Ташаббус-2021» кўрик-танловининг туман босқичи бўлиб ўтди.

Танловни ўтказишдан мақсад – худудларда кичик бизнес ва хусусий тадбиркорликни жадал ривожланишини рағбатлантирувчи бизнес муҳит яратиш, мамлакат иқтисодиётида хусусий секторнинг улуши ва аҳамиятини ошириш, тадбиркорларнинг касбий маҳорати ва билим даражасини ошириш учун зарурий шарт-шароит яратиш, тадбиркорлик фаолиятидаги илғор тажрибаларни оммалаштириш, тадбиркорлар ўртасида хўжалик алоқаларини кенгайтириш ва улар ишлаб чиқараётган маҳсулотларни реклама қилишга кўмаклашиш, тадбиркорлик фаолиятида корпоратив бошқарув тамойилларини жорий этишга кўмаклашиш ҳисобланади.

Ҳайъат аъзолари иштирокчилар томонидан намойиш этилган маҳсулотларни кўздан кечириб, уларнинг ҳулосасига кўра куйидагилар ғолиб деб топилди:

Асосий номинациялар бўйича:

  • Саноат соҳасида – “Йилнинг энг яхши тадбиркори” номинацияси буйича I ўринни туманда фаолият кўрсатаётган “Feed korm chiсkens” МЧЖ;
  • Хизмат кўрсатиш соҳасида – “Йилнинг энг яхши тадбиркори” номинацияси бўйича I ўринни туманда фаолият кўрсатаётган “Konimex-Qizilqum Shubat ” МЧЖ;
  • “Йилнинг энг яхши ёш тадбиркори” номинацияси бўйича I ўринни туманда фаолият юритаётган “Aykerim” МТМ;
  • “Йилнинг энг яхши фермери” йўналишида I ўринни эса, “Учкун-Наркул-ўғли” ФХ;
  • “Йилнинг энг яхши ҳунарманди” йўналишида I ўринни туманда фаолият кўрсатаётган ЯТТ Джурақулова Дилнавоз Эргашбоевна эгаллаб кўрик-танловнинг вилоят босқичига йўлланмани қўлга киритишди.

Конимех тумани ҳокимлиги Ахборот хизмати.

Iyun 4, 2021
 Болалар мусиқа ва санъатда мактабида  Ўзбекистон Республикаси касаба уюшмалари Федерацияси соврини учун “Энг яхши маҳалла раиси” танловининг Конимех туман босқичи бўлиб ўтди.

Тадбир Ўзбекистон касаба уюшмалари Федерацияси томонидан туман ҳокимлиги ва бошқа бир қатор идоралар кўмагида ташкил этилди.

Ўзбекистон касаба уюшмалари Федерацияси томонидан ташкил этилган “Энг яхши маҳалла раиси” Республика танловиниг туман босқичи хотин-қизлар муаммоларини “хонадонбай” ва “фуқаробай” ўрганиш ва уларни ҳал этиш, “Аёллар дафтари” тизимини самарадорлиги ва жамоатчилик ролини  янада ошириш, хотин-қизларни ижтимоий қўллаб-қувватлаш, “Аёллар давтари”га киритилган хотин-қизлар билан ишлаш, аёлларнинг муаммоларини ҳал этишда ўзининг фидокорона меҳнати билан барчага намуна қўрсатган маҳалла раисини муносиб рағбатлантириш мақсадида бўлиб ўтди.

Танлов натижаларига кўра “Кўкча” МФЙ раиси Тынышбек Абдурахманов вилоят босқичада иштирок этиш ҳуқуқини қўлга киритди.

Тантана якунида ғолиб ва совриндорларга ташкилотчилар томонидан таъсис этилган диплом, қимматбаҳо ва эсдалик совғаларини таниқли ўзбек актёри, қизиқчи Валижон Шамшиев топширди.

Iyun 4, 2021

Аҳолини рўйхатга олиш Ўзбекистон Республикасининг барча ҳудудларида ягона статистика услубияти асосида ўтказиладиган, белгиланган санага қадар аҳолининг демографик ва ижтимоий-иқтисодий тавсифини аниқловчи маълумотларни йиғиш, олинган маълумотларни қайта ишлаш ва умумлаштириш, якуний маълумотларни кенг оммага тарқатиш ва ундан фойдаланиш жараёнидир.

Бу тадбирда нафақат статистика органлари, балки республиканинг бошқа давлат ва хўжалик бошқаруви органлари ҳам бевосита иштирок этадилар. Жумладан, Ўзбекистон Республикаси Давлат солиқ қўмитаси ҳузуридаги Кадастр агентлиги аҳолини рўйхатга олиш тадбирини ўтказиш учун зарур бўлган миқдорда картографик материалларнинг (шаҳар ва қишлоқ аҳоли пунктларининг схематик режаси, маъмурий туманлар харитаси) тайёрланишини таъминлайди.

Ўзбекистон Республикаси Вазирлар Маҳкамаси ҳузуридаги “Ўзархив” агентлиги аҳолини рўйхатга олиш варақаларини ва бошқа ҳужжатларни сақлаш бўйича ишларни мувофиқлаштиради, шунингдек, аҳолини рўйхатга олишнинг йиғма ҳужжатларини қайта ишлангандан сўнг доимий сақланишини ўз назоратига олади. Ўзбекистон Республикаси Ички ишлар Вазирлиги аҳолини рўйхатга олишга жалб этилган шахсларнинг тўлиқ хавфсизлигини ва рўйхатга олиш материалларининг сақланишини таъминлайди.

Шу мақсадда, 2020 йилнинг 11 ноябрида Ўзбекистон Республикаси Вазирлар Маҳкамаси томонидан “Ўзбекистон Республикасида 2023 йилда аҳолини рўйхатга олишга тайёргарлик кўриш ва уни ўтказиш чора-тадбирлари тўғрисида”ги 710-сонли қарори қабул қилинди. Унга кўра, мамлакатимизда аҳолини рўйхатга олиш 2023 йил 1—25 ноябрь кунлари амалга оширилади.

Мазкур вазифалар тизимли тарзда амалга оширилиши натижасида республика аҳолиси тўғрисидаги ишончли маълумотлар базаси яратилади.

 

Конимех тумани статистика бўлими

May 20, 2021
 

Конимех тумани ҳокимининг қарори ҳам электрон тизим орқали қабул қилинди.

Конимех туманида ҳокимлар қарорларини қабул қилиш жараёнини бутунлай электрон шаклда амалга оширишни назарда тутувчи “E-qaror” электрон тизими ишга туширилиб, у орқали туман ҳокимининг қарори қабул қилинди.

Ҳудудда мазкур йўналишдаги ишлар адлия вазирлиги ишчи гуруҳи кўмагида белгиланган тартибда шакллантирилиб, туман ташкилотларининг соҳа бўйича тегишли масъуллари иштирокида семинар-тренинг ташкил этилди.

Конимех туманида туман ҳокимининг “Ўзбекистон Республикаси Президентининг 2021 йил 5 майдаги “Соғлиқни сақлаш тизимида олиб борилаётган ислоҳотларни изчил давом эттириш ва тиббиёт ходимларининг салоҳиятини ошириш учун зарур шарт-шароитлар яратиш тўғрисида”ги ПФ-6221-сонли Фармони ҳамда вилоят ҳокимининг 2021 йил 8 майдаги Қ-74-сонли қарори ижросини таъминлаш ҳақида”ги илк электрон қарори қабул қилинди.

Янги онлайн дастурнинг устунлик томонлари, чиқарилаётган қарорларни тўғридан-тўғри “E-qaror” электрон тизими орқали кенг жамоатчилик бемалол кузатиб бориши мумкин.

“E-qaror” электрон тизимини республикамизнинг барча маҳаллий давлат ҳокимияти органларида жорий этилиши уларнинг фаолияти ва иш юритувининг шаффофлашишига, ортиқча вақт сарфланишининг, қоғозбозликнинг олдини олишга хизмат қилади.

Эслатиб ўтамиз, ноқонуний ҳужжатлар қабул қилинишини олдини олиш, ҳокимликлар фаолияти очиқ ва ошкоралигини таъминлаш, соҳага замонавий ахборот коммуникация технологияларини жорий этиш мақсадида Ўзбекистон Республикаси Вазирлар Маҳкамасининг 2020 йил 14 апрелдаги 218-сон “Маҳаллий ижро этувчи ҳокимият органлари томонидан қабул қилинадиган қарорларни ишлаб чиқиш, келишиш ва рўйхатдан ўтказишнинг ягона электрон тизимини жорий этиш чора-тадбирлари тўғрисида”ги қарори қабул қилинган.

Қарорга асосан маҳаллий ижро этувчи ҳокимият органларининг қарорларини ишлаб чиқиш, келишиш ва рўйхатдан ўтказишнинг ягона электрон — “E-qaror” 2021 йилнинг январь – май ойларида Қашқадарё вилоятида апробация қилиш юзасидан ҳуқуқий эксперимент ўтказилиши, 2021 йил 1 июлдан бошлаб ҳуқуқий эксперимент натижалари асосида “E-qaror” электрон тизими республиканинг барча даражадаги маҳаллий ижро этувчи ҳокимият органларида жорий этилиши белгиланган.

May 19, 2021

Йиғилиш бошида давлатимиз раҳбари халқимиз соғлиқни сақлаш соҳасининг ҳолатидан норози, ҳар бир раҳбар тиббиёт бўйича аҳоли олдида ҳисобдор бўлиши керак,- деб таъкидлаб ўтди.

Маълум қилинишича, жойларда ўтказилган сўровларда бор-йўғи           13 фоиз аҳоли тиббиётда ижобий ўзгаришларни сезаётганини билдирган. Айниқса, Андижон, Хоразм ва Тошкент вилоятларида яшовчи аҳоли бу соҳадаги ишлар аҳволидан қониқмаяпти.

Давлат раҳбари соҳада 5 та йўналишда жиддий ўзгаришлар қилиш шартлигини қайд этди:

Биринчиси – бирламчи тиббиёт бўғинини касалликни эрта аниқлайдиган ва даволайдиган тизимга айлантириш.

Иккинчиси – ихтисослашган марказлар томонидан жойларда тор доирадаги тиббий хизматлар ҳажмини ошириш ва сифатини тубдан яхшилаш.

Учинчиси – рақамлаштириш орқали соҳада қоғозбозлик, бюрократия ва коррупцияни кескин қисқартириш.

Тўртинчиси – тиббиётнинг барча йўналишларида рақобатнинг ривожланиши ва хусусий сектор жадал кириб боришини ҳар томонлама қўллаб-қувватлаш.

Бешинчиси – тиббиёт ходимларининг билимини ошириш, таълим ва илм-фанни ривожлантириш.

Президент бу ишларни вазир, вазир ўринбосарлари, вилоят, туман ва шаҳар тиббиёт раҳбарларининг ҳаммаси ҳам аниқ тушуниб ишламаётганини айтди.

Бепул тиббиёт йўқ деяпти одамлар. Ҳаммаёқда коррупция деяпти одамлар. Республикадан маблағ ажратиляпти, лекин унинг қадрига етиб тўғри йўналтирилмаяпти, – деди давлат раҳбари.

Шу йил 1 июлдан бошлаб сурункали касалликларни бирламчи бўғинда даволаш бўйича янги тизим жорий этилади.

Биринчи босқичда Сирдарё вилоятида оилавий шифокор пункти ва поликлиникалар орқали, эрта ўлимнинг асосий сабаби бўлган юрак ва қон-томир касалликларини даволаш учун аҳоли дори воситалари билан бепул таъминланади.

Давлат раҳбари Соғлиқни сақлаш вазирининг биринчи ўринбосари А.Иноятовга бир ой муддатда бирламчи бўғинда даволаш бепул тиббий хизматлар пакетини амалиётга киритиш топшириғини берди.

Президент туман ва шаҳар ҳокимлари бир нарсани аниқ тушуниб олиши зарур. Агар улар қўшимча маблағ ажратиб, ўз ҳудудидаги оилавий шифокор пункти ва поликлиникаларда шароитни яхшиласа, малакали шифокорларни кўпайтирса аҳолининг 70 фоиз муаммолари жойида ҳал бўлади  деди.

Бунга Китоб тумани мисол бўлади. Ҳудудда 1 ой ичида сурункали касалликлар бўйича учинчи ва тўртинчи гуруҳга мансуб 20 турдан ортиқ касалликлар бўйича 1,5 минг беморга жойида керакли ёрдам кўрсатилгани боис, вилоят ва республика шифохоналарига мурожаат 2 бараварга камайган.

Йиғилишда 20 та туманда тиббиёт бирлашмаларининг ишлари етарли даражада ташкил этилмагани қайд этилди. Улар Қоровулбозор, Чироқчи, Қамаши, Қўнғирот, Чимбой, Марҳамат, Жалақудуқ, Зарбдор, Мингбулоқ, Поп, Оқдарё, Сайхунобод, Ангор, Пскент, Юқоричирчиқ, Ёзёвон, Учкўприк, Янгиариқ, Хива, Сергели туманлари.

Сўнгги бир йил ичида тиббий хизмат сифатини оширишга қаратилган 20 дан ортиқ фармон ва қарорлар қабул қилиниб, барча масалалар ҳал қилиб берилган.

Соҳани ривожлантириш мақсадида жорий йилда бюджетдан 21 триллион сўм ажратилган. Бу 2017 йилга нисбатан 3 баравар кўп.

Лекин вазир ўринбосарларининг масъул участкаси масалани ҳал қилишда ваколати бўлмаса, фидойи бўлиб, пастга тушиб бевосита маҳаллада ишни ташкил қилмаса, ислоҳотлар аҳолигача етиб бориши қийин. Шу боис, бугундан бошлаб барча вазир ўринбосарлари ўз йўналишлари бўйича, ислоҳотлар натижадорлигига масъулиятни тўлиқ олган ҳолда, шахсан жавоб беради, – деди давлатимиз раҳбари.

Давлатимиз раҳбари “Қишлоқ шифокори” дастури доирасида олис ва чекка ҳудудларга шифокорларни жалб қилиш ишлари суст олиб борилаётганига ҳам алоҳида тўхталди.

Таъкиданишича, шу пайтгача чекка ҳудудларга атиги 36 нафар шифокор ишга қабул қилинган. Жиззахда бирорта шифокор билан шартнома тузилмаган.

Бундан ташқари, ишга қабул қилинган тиббиёт ходимларига 30 миллион сўмлик бир марталик тўловни амалга ошириш ҳам энди бошланмоқда. Маълум бўлишича, Навоий вилоятида ҳозирча 6 нафар, Фарғона вилоятида 4 нафар шифокор бир марталик тўловларни олган.

Президент бу борадаги ишларни жадаллаштириш мақсадида Соғлиқни сақлаш вазирлиги, туман ва шаҳар ҳокимлари, тиббиёт йўналишидаги олий таълим муассасалари ректорларига камида 200 нафар битирувчини олис ва чекка ҳудудларга ишга юбориш бўйича шартнома имзолаш топшириғини берди.

 

Конимех туман адлия бўлими

May 18, 2021

Қозоғистонда бўлиб ўтган дзюдо бўйича ёшлар ўртасидаги Осиё кубогида Ўзбекистон спортчилари 14 та медални қўлга киритишди ва умумжамоа ҳисобида 2-ўринни эгаллашди.

Қозоғистоннинг Олма-ота шаҳрида 14−16 май кунлари Бекет Махмутов хотирасига бағишлаб дзюдо бўйича ўсмирлар ва ёшлар ўртасида Осиё кубоги бўлиб ўтди. Мусобақада Осиё мамлакатларидан 200 га яқин татами усталари иштирок этишди. Бу ҳақда Миллий олимия қўмитаси ахборот хизмати хабар бермоқда.

Осиё очиқ кубогининг дастлабки икки кунида ўсмирлар татамига чиқишган ва унда Ўзбекистон терма жамоаси 6 та олтин, 8 та кумуш, 11 та бронза медалини қўлга киритди.

Мусобақанинг сўнгги кунида ёшлар ўртасидаги беллашувлар бўлиб ўтди. Ҳалимажон Қурбонова (-48 кг), Сита Кадамбаева (-52 кг), Фотима Курамбоева (78 кг), Абдулбосит Абдусалимов (-66 кг), Ўткирбек Тўрабоев (-100 кг), Шоҳрух Мамарасулов (+100 кг) олтин медалларни қўлга киритди. Жайхунбек Назаров (-73 кг) ва Исломбек Равшанқулов (100 кг) кумуш, Фарангиз Режепова (-63 кг), Фарангиз Холмуродова (-70 кг), Мамлакат Султонова (-70 кг), Шинар Ибраева (-78 кг), Шавкат Саитқулов (-66 кг) ва Дилшоджон Баҳодиров (-90 кг) бронза медалларни қўлга киритишди.

Сўнгги кунги баҳслар натижаларига кўра, ўзбекистонлик дзюдочилар 6 та олтин, 2 та кумуш, 6 та бронза, жами 14 та медалга эга чиқишди.

Ўзбекистон терма жамоаси битта олтин медаль фарқи билан умумжамоа ҳисобида мезбонлардан сўнг 2-ўринни банд этди.

gazeta.uz

May 18, 2021

Мутахассисларнинг таъкидлашича, пахта етиштиришдаги барча агротехник тадбирларни муддатида ва сифатли ўтказиш муҳим ҳисобланади. Хусусан, чигит экиш ва униб чиққан ғўза ниҳолларига биринчи ишлов бериш алоҳида аҳамиятга эга. Ушбу тадбир сифатли бажарилмаса, майдонларда бир текис кўчат олинмайди, далалардаги нимжон ниҳоллар касаллик ва зараркунандалар билан зарарланиб, туп сони камайиб кетади. Навоий вилоятида жорий йил 32 588 гектар майдонга чигит қадалган эди. Бугунги кунга келиб 18 999 гектар майдон 1-2 чинбарг, 9 190 гектари 3-4 чинбарг, 333 гектар ғўза майдони эса 5-6 чинбарг фазалари бўйича ривожланмоқда. 

Ўзбекистон Республикаси Вазирлар Маҳкамаси ҳузуридаги агросаноат мажмуи устидан назорат қилиш Инспекцияси вилоят бошқармаси ҳамда туман бўлимлари инспекторлари томонидан жойлардаги ғўза майдонларида агротехник тадбирларни кечиктирмай, оби-тобида бажарилиши устидан назорат олиб борилмоқда. Жумладан, вилоятда айни кунда ғўза қатор ораларига биринчи ва иккинчи ишлов бериш, культивация ишлари қизғин давом этмоқда. Вилоят бўйича 740 та культиватор мазкур тадбирга жалб этилган бўлиб, 11 май ҳолатига кўра, ўртача бир кунда 3,1 гектар майдон ғўза қатор ораларига ишлов берилмоқда. Мавсум бошидан буён 30 812 гектар майдонга биринчи, 7 249 гектар майдонга эса иккинчи ишлов бериш агротехник тадбири амалга оширилди.

–        Ғўза қатор ораларига ишлов беришдан асосий мақсад – бегона ўтларга қарши курашиш, тупроқнинг юза қисмини майин юмшатиб, намни сақлаш, тупроқнинг тезроқ қизишини ҳамда микроорганизмларнинг яхши ривожланишини таъминлаш ҳисобланади, – дейди “Ўзагроинспекция” вилоят бошқармаси бош инспектори Беҳзод Бозоров.-  Ғўза қатор ораларига биринчи ишлов беришда чопиқ агрегатларининг ишчи органлари тўғри ўрнатилганлиги ва созлигини назоратга олганмиз. Масалан, биринчи ишлов беришда чопиқ агрегатига 60 см кенгликдаги ҳар бир қатор орасига икки жуфтдан ротацион юлдузчалар, иккитадан қирқувчи пичоқ ва биттадан ўқёйсимон панжа ўрнатилади. Қатор ораси 90 см бўлганда ушбу тўпламга яна иккитадан қирқувчи пичоқ қўшилади. Далада бегона ўтлар кам бўлса, тупроқни майин юмшатиш учун қирқувчи пичоқлар ўрнига юмшатгич панжаларни қўллаш мақсадга мувофиқ бўлади. Бундан ташқари, ўғит солиш жараёни сифатли ва меъёрда амалга оширилиши учун ўғит солиш аппаратлари, ўғитўтказгичлар ва ўғит сошниклари ҳам соз бўлиши керак. Булар бўйича фермерларга керакли тавсиялар бериб келинмоқда.

Жорий йил Хатирчи туманида 10 685, Қизилтепада 8 359, Навбаҳорда 7 555, Карманада 5 440, Конимехда 549 гектар майдонга чигит уруғи экилган эди. Жумладан, Хатирчи туманида мавсум бошидан буён 10 070 гектар, Қизилтепа туманида 7 997, Навбаҳорда 7 018, Карманада 5 204, Конимехда эса 523 гектар ғўза майдон қатор ораларига биринчи ишлов берилди.

Қизилтепа туманида жорий йил 233 та фермер хўжалик ерида чигит қадалган бўлиб, бугунги кунда ҳудудда ғўзалар 4 845 гектар 1-2, 2 383 гектар 3-4, 84 гектар 5-6 чинбарг ривожланиш фазаларида ўсмоқда.

Туман бўйича 203 та культиватор қатор ораларига ишлов бериш учун жалб этилган. Мавсум бошидан буён 1 900 гектар майдонда иккинчи ишлов бериш ишлари бажарилди. Жумладан, “Оқ олтин” ҳудудидан “Нарзулло Турсун нияти”, “Бўстон” ҳудудидан “Косагарон орзуси” ва “Усто пахтакор” фермер хўжаликларида иккинчи ишлов бериш ишлари якунланиш арафасида.

–        Пахта майдонимиз 45,8 гектар бўлиб, унга “Бухоро 6” чигит навидан экканмиз,- дейди   “Нарзулло Турсун нияти” фермер хўжалиги раиси Тўлқин Турсунов. – Ҳозир тўлиқ ниҳолларимиз униб чиққан. Даламизда 2-культивация ишлари 70 фоизга бажарилди.  Шу билан бирга бир марта ҳар гектарга 3 килограммдан карбамид билан суспензия сепиш ишлари ҳам бажарилди. 40 та мавсумий ишчимиз бор. Ғўзаларимиз тўлиқ чопиқ қилинди. Яганалаш тадбирини ҳам яқин кунларда якунлаймиз. Барча агротехник тадбирларни бориши ва сифатли бажарилишини “Ўзагроинспекция”нинг туман бўлими инспекторлари назорат қилиб боришмоқда.

Маълумот ўрнида қайд этиш жоиз, бугунги кунда вилоятда ғўзани чопиқ қилиш ва яганалаш учун 20 400 нафар ишчи пахта майдонларида меҳнат қилди. Мавсум бошидан буён 30 689 гектар майдон чопиқ қилинган бўлса, 16 815 гектар майдонда ғўзани яганалаш ишлари амалга оширилди.  Бундан ташқари мавсум бошидан буён вилоятда жами 347 та чуқур юмшатгич билан 14 954 гектар пахта майдонида чуқур юмшатиш агротехник тадбири бажарилди.

Ғўза агротехникаси тадбирларининг сифатли ва ўз вақтида олиб борилиши эртанги ҳосилнинг чўғи баланд ва хирмоннинг баракали бўлиши гаровидир.

 

“Ўзагроинспекция” вилоят бошқармаси

 матбуот хизмати

May 13, 2021

Ҳар йили 12 май халқаро Ҳамширалар куни сифатида бутун дунё нишонлаб келади. Тиббиёт соҳасида шифокорларнинг ўрни ва маъсулияти билан бирга малакали ҳамшираларнинг ўрни хам беқиёс.

Сабаби беморни даволашда агар шифокор бор билим ва қобилиятини кўрсатса, малакали ҳамшира эса беморга рухий мадад бериб боришда ҳам ўзини намоён қилади.

Ҳозирги пайтда давлатимизда берилаётган имкониятлар шундан далаолат берадики, тиббиёт соҳасида нафақат малакали шифокор, балки малакали ҳамшираларга ҳам кенг имкониятлар яратиб берилмоқда.

Тадбирни Навоий вилояти ССБ бошлиғи З.Расулов очиб берди. Сўнг саҳнага туман ҳокими ўринбосари К. Шамшиев сўзга чиқиб, соҳа ҳодимларини мазкур касб байрамлари билан қутлаб, уларнинг масъулиятли ишларида муваффаққият тилади.

Ҳамшира нафақат беморлар билан ишлаши балки ўзининг илмий фаолиятини ҳам олиб бориши кераклиги, бу борада мамлакатимизда жуда катта имкониятлар яратилганини ва бу имкониятлардан барча ўрта ва кичик тиббиёт ҳодимлари бўндан тўғри фойдаланиш кераклигини таъкидлаб ўтди.

Навоий вилояти ССБ бошлиғи З.Расулов “Боймурат” ОВПда узоқ йиллар давомида беъминнат халқ хизматида фаолият кўрсатиб келаётган ҳамшираларни ташаккурнома, фахрий ёрлиқ ва эсдалик совғалари билан тақдирлади.

Тадбир сўнгида ташриф буюрган барча мехмонлар  учун туман маданият бўлимининг фаол ўғил-қизлари ижросида дилрабо куй-қўшиқ ва рақслари билан ўз чиқишларини намойиш қилишди.

Конимех тумани ҳокимлиги матбуот хизмати.

May 13, 2021

Аллоҳ таолонинг марҳамати ёғиладиган ушбу барокатли ва нурафшон кунда Сизларни, барча мўмин-мусулмонларни, Ислом динининг улуғ ва муборак байрамларидан бири бўлмиш Рамазон ҳайити билан чин қалбимдан муборакбод этаман.

Aввало, мана шундай файзли, нурафшон кунларга етиб келганимиз учун Aллоҳ таолога беҳисоб шукроналар айтамиз.

 Инсонларни эзгулик ва ҳайр-саховат ришталари ила бир-бирларига янада яқинлаштирувчи ушбу айём уйингизга файз-барака, тўкин-сочинлик ҳамда тинчлик олиб киришига тилакдошман.

 Дунёнинг узоқ-яқин мамлакатлари мусулмонларини ҳам самимий қутлаб, уларга тинчлик, бардавом тараққиёт ва фаровонлик ёр бўлишига тилакдошман.

 Меҳнаткаш ва оқкўнгил халқимизнинг мўътабар моҳи Рамазонда қилган барча эзгу ният ва дуолари ижобат бўлсин!

Жонажон Ватанимизни, азиз халқимизни Яратганнинг Ўзи паноҳида асрасин! 

Рамазон ҳайити барчамизга муборак бўлсин!

 

Конимех тумани ҳокими Муратхан Эгамқулов.

Spelling error report

The following text will be sent to our editors: